नेपाली हास्यव्यङ्ग्य अनलाइन पत्रिका

कविराज घिमिरे :

न चैत्र शुष्क मान्दछिन् न मान्दछिन् भदौ हिलो
अतीव प्यार गेहमा छ एकनासको किलो
सुयोग्य पार्न बालमा सदैव हुन्छ चिन्तना
समस्त मातृशक्तिमा हजार लाख वन्दना ।। १

कुमार हुन् कि यौवना छ ख्याल प्रौढसम्ममा
अघाउँजी बने अरू त्यसै भएर टम्ममा
मुसुक्क हाँस्न सक्तछिन् बुझेर भाव छन्दमा
समस्त मातृशक्तिमा हजार लाख वन्दना ।। २

छ तत्त्ववोध मातृमा सुशान्त दृष्टि छन् भला
अनेक जालझेलको चुँडिन्छ तुच्छ शृङ्खला
यिनै सुमेरु बन्दछन् लिएर काख नन्दिना
समस्त मातृशक्तिमा हजार लाख वन्दना ।। ३

अरू रुँदा हँसाउँछिन् हुँदा अनन्त तापमा
कला छ फुत्त निस्कने परे अजङ्ग कापमा
पवित्र पेय कर्म छन् परोपकार भावना
समस्त मातृशक्तिमा हजार लाख वन्दना ।। ४

अरू निमित्त जिन्दगी भुटिन्छ शोध को दिने ?
अरू निमित्त सादगी बनिन्छ ध्यान को दिने ?
कहाँ सकिन्छ ? मातृको पुकार गान गर्नमा
समस्त मातृशक्तिमा हजार लाख वन्दना ।। ५

विहीन यी कलङ्कका सफेद हैमझैँ बनी
प्रधान हेर राष्ट्रका बने अतुल्य चाँदनी
सुधा विशिष्ट मातृ हुन् नठान व्यर्थ सन्जना
समस्त मातृशक्तिमा हजार लाख वन्दना ।। ६

०००
भक्तपुर