नेपाली हास्यव्यङ्ग्य अनलाइन पत्रिका

कुमार खड्का :

सिनो च्याप्दै हिँड्नेबिच युद्ध जित्ने कुरा हुन्छन्‌
गुड्डी हाँक्दा भर निमेषमै म्याराथुन पूरा हुन्छन्‌
रूप यौवनको के कुरा भयो ? बाँदरको जुनीमा,
मुर्दा बाघको जुँगा तान्ने सबैभन्दा सुरा हुन्छन् ।
१

कहिलेकाहीँ नियमितता माया, प्रेमको रङ्गमा हुन्छ
अपनाउने, बिटुलाउने स्वयम् आफ्‌नै ढङ्गमा हुन्छ
गजब हुन्छ नकचरो प्रवृत्तिलाई बुझ्न सके,
अजर, अमर भने पनि बिछोडिने भङ्गमा हुन्छ ।
२

हदभन्दा पीडा सहेपछि आसक्ति, गुनासो मर्दछ
ऐँठन रोकिन्छ छातीमा झन् मुटुको पत्रमै सर्दछ
सन्तुलन के कायम होला ? पक्षाघाती मस्तिष्कमा,
राम्रो, नराम्रो जे होस् अब मूढ शरीरले गर्दछ ।
३

अवमूल्यन भयो कि द्रव्यमा चहकिँदै छ माया ?
फिरन्ते यात्रीझैँ अविश्वासले बहकिँदै छ माया ?
भावनाको फूल हाँस्ने हृदयको सङ्गीत भन्छन्, खै ?
घात, प्रतिघातले सतहमा किन टहकिँदै छ माया ?
४

०००
आलापाेट, काठमाडाैं
शीर्षकविहीन शीर्षकहरू (२०८२)