नेपाली हास्यव्यङ्ग्य अनलाइन पत्रिका

कोमल प्रसाद भट्ट :

साँच्चै सुन्दर शान्त देश सबको आँखा थियो हर्दम
गर्थ्यो आदर विश्वले हरघडी ठानेर सर्वोत्तम
आफ्नो मान इमान आज किन हो चाहिन्न नेपालमा
निष्ठा नैतिकता नखोज अहिले पाइन्न नेपालमा~१

भ्रष्टाचार तथा कुकर्म चुलिए भण्डार सुक्दै गयो
फ्याँके इज्जत नालमा कपुतले दुर्गन्ध हाबी भयो
चर्का घूस र लेनदेन घटिया रोकिन्न नेपालमा
निष्ठा नैतिकता नखोज अहिले पाइन्न नेपालमा~२

जस्को शक्ति अपार भक्ति निजकै पूजा तथा प्रार्थना
बन्दा सेवक पाइने निकटता पूरा हुने चाहना
उम्दा हो कि अयोग्य हो सबकुरा जाँचिन्न नेपालमा
निष्ठा नैतिकता नखोज अहिले पाइन्न नेपालमा~३

हिंसाका व्यभिचारका बिगबिगी सोचाइ खोटो अति
हर्ने प्राण समेत निर्दयहरू दुर्वृत्तिका दुर्मति
लोहाको मुटु हुन्छ दुष्ट जनको पग्लिन्न नेपालमा
निष्ठा नैतिकता नखोज अहिले पाइन्न नेपालमा~४

चौतारी उपभोग गर्छ लुटुवा शूली चढे सज्जन
बिक्री हुन्छ नियाँनिशाफ सहजै अन्यायमा निर्धन
राम्राको गुणगान शुद्ध मनले गाइन्न नेपालमा
निष्ठा नैतिकता नखोज अहिले पाइन्न नेपालमा~५

संज्ञानी सरिता गुणी गहकिला खोजिन्न कैले पनि
काला कल्मष वा कुपात्र कपटी रोजिन्छ जैले पनि
नौनी निर्मल नम्र नायकहरू छानिन्न नेपालमा
निष्ठा नैतिकता नखोज अहिले पाइन्न नेपालमा~६

जुट्छन् लुब्ध लबस्तरा जति यहाँ खानापिना खातमा
झूटा झेल र जालमा झडपमा जङ्गी खुराफातमा
सच्चा सोच सुभावका तरुहरू रोपिन्न नेपालमा
निष्ठा नैतिकता नखोज अहिले पाइन्न नेपालमा~७

पर्दाभित्र अवैध काम बहुतै गर्ने दुराचारका
सौदा लाख करोडमा तय हुने सङ्कीर्ण व्यापारका
कोशेली उपहार भेट भरिला छोडिन्न नेपालमा
निष्ठा नैतिकता नखोज अहिले पाइन्न नेपालमा~८

छैनन् उच्च विचारका अनुभवी खाँचो छ उत्कृष्टता
मारामार मुटावले मनपरी कच्चा छ आत्मीयता
सारा पद्धति जीर्ण जर्जर हुँदा टालिन्न नेपालमा
निष्ठा नैतिकता नखोज अहिले पाइन्न नेपालमा~९

झार्छिन् आँशु बलिन्द्र जन्मजननी सन्तानका कर्मले
गैह्रा घाउ जताततै भतभती पोल्ने कडा मर्मले
मर्यादा मृदु भाव मानमनितो राखिन्न नेपालमा
निष्ठा नैतिकता नखोज अहिले पाइन्न नेपालमा~१०

०००
चन्द्रागिरि नपा- १३, काठमाडौँ ।
हालः- न्युयोर्क अमेरिका ।