नेपाली हास्यव्यङ्ग्य अनलाइन पत्रिका

शेषराज भट्टराई :

अहिले एउटा लाेकगीत सम्झनामा आइरहेको छ “राताे भाले क्वायाँक्वायाँ सुत्केरीलाई ख्वाएँ, सुत्केरीको नामगरी टाउको मैले खाएँ”। नेपालकाे पुरानो परिपाटी नै यस्तै छ एउटा काम गर्छु भनेर अर्काे काम गर्ने । मिलेसम्म कामै नगरी आँखामा छाराे हाल्ने । छलीधन्दा भन्दा फरक पर्दैन । विशेषगरी भालेजातिहरु यस्तो छलिकाम गर्न पाए आफ्नो सिउर अग्लाे भएकोझै ठान्छन् । इमानजमान भड्खालाेमा परेकाे पत्तै पाउँदैनन् । तथापि महिला गण पनि हामी पुरुष भन्दा केहीमा पनि कमी छैनाैँ भनेर स्वविवेककासाथ जबर्जस्ती अगाडि लम्की रहनुभएको छ जुन आफैंमा विशेष छ र विचरणीय पनि ।

यहाँहरुलाई थाहा नै हाेला अनुहारभरी मात्रै हाेइन शरीरको हरेक क्षेत्रमा झ्याउ पलाएकै भरमा आफ्नो ह्याउ दराे भएको महसुस गर्ने भालेहरु शिरकाे ताज सिउर हल्लाउँदै राज गर्न रुचाउँछन् । अलिक निर्धाे देखेभने बाजझैं झम्टिन्छन् । सर्पकाेझैं फडा फुलाएर स्वास्वाँ गर्दै पाेथीलाई आतङ्कित पार्नमै आफ्नो बहादुरी र पाैरख सम्झन्छन् । एउटा इमानदार बफादार हाेनहार भालेका लागि यो ज्यादै शर्मकाे कुरा हाे ।

साँच्चै भनाैँभने नेपालकाे विकासकाे बाधक नै भाले । उत्ताउलो भाले रातिको एकबजे बास्छ भन्ने त भनाइ पनि छ । सुत्केरीलाई खुवाउन भनेर लगेको भाले सुत्केरीले नै खान पाउनुपर्छ भन्ने कुरा भालेले हेक्का नराख्दा हिक्का छाेडेर रुन मन लाग्छ । खायो ,चर्याे, चाेर्याे मनपरि गर्याे अनि गुँडमा पसेर लम्पसार पर्याे । असली भालेलाई न भविष्यको साेचाइ छ न भाेलिकाे । न बाेलीकाे न झाेलीकाे खाली पखेटा फटफटायाे, जगर फुलायाे, काेतार्याे भुतभुते खेल्याे बास्याे हाँस्याे रमायाे समायाे पाेथीमाथि हैकम जमायाे बस् आफ्नो शुरु र अन्तिम लक्ष्य नै यही ठान्छन् । न आफू जान्दछन् अरुले भनेको मान्दछन् । हाे ! यसैलाई भन्छन् भाले । भाले हुन्छन् प्राय एकै खाले ।

तेह्र वर्षीय निर्मला पन्तहरुकाे चाेलालाई खाेलामा मिलाउने नै भाले । अनि यस्ता बहादुर भालेलाई संरक्षण दिने पनि भाले । घटनाकाे साँक्षी दिदीबहिनीलाई संरक्षण दिने पनि भाले । घटना घटाउने पनि भाले, घटनाकाे अन्वेषण गर्ने पनि भाले, घटना सामसुम पारेर ढाकछोप पार्ने पनि भाले । अनुसन्धानको बाधक पनि भाले । भालेहरु एउटाले पिटेझैं गर्छ अर्को राेयझैं । साँच्चै बाले जन्माएका भाले प्रशंसनीय छन् र त बजारमा भालेकाे भलाईका लागि ठमेल ठिमठिम पर्दै अहाेरात्र जागा रहन्छ ।

अस्ति भर्खरै भारतमा बत्तीस जना भालेहरुले एउटी कलिली नानीमाथि चुच्चो गाडेर कलिलाे काेपिलाकाे चाेलालाई खाेलामा मिलाए । त्यस्तै भारतकै अर्को भालेकाण्ड पनि उद्देक लाग्दाे छ । जस्ले दाजुकाे २/३ वर्षकाे छाेरालाई खुट्टामा समातेर पाहा पछारेझैं पछारेर मार्याे । भालेमा कठाेर कर्मठ र पापकाे मात्राधिक हुन्छ । त्यसैले यिनकाे सिउरमा समाएर च्वाईंघ्वाईं पार्नु पर्छ । नत्र यसले सीमा उल्लंघन गरेर धीमा गतिमा बिगार विठ्याँई गरिरहेका हुन्छन् । जेहाेस् भाले बहादुरीकाे मूल्याङ्कन गर्दै त्यहाकाे अदालतले ती सबै जाेदाहा भालेलाई खाँसीकाे प्रवाह नगरी फाँसीकाे तजविज गरेकाे पनि भाले जाेदाहा भएर नै हाे । भाले बाले नगरेकाे काम गर्छ र हाँसी हाँसी फाँसीमा लड्किन्छ । त्यसैले हाेला धेरैले भालेलाई मुर्खकाे उपमाले विभूषित गरेका छन् ।

प्रकृतिले भाले र पाेथीकाे शारीरिक बनाेटमा थाेरै मात्र फरक गरेको छ तर मान्छेले त लगाउने लुगै फरक गरेको छ । भालेले लगाउने लुगा बिरसिला, उदासिला, बुट्टारहित भनेर ताेकीदिएकाे छ समाजले भने महिलाले लगाउने लुगा गहना, र कपाल पनि फरक ढाँचामा देख्नु खेप्नु पर्दा विभेदको खाडल निकै फराकिलो र गहिरो लाग्छ । फेरि लिबिष्टिक पाउडर पनि तिनैलाई । तल्लाे पेट माथिल्लो पेट तिनैलाई । महिलाको तुलनामा भालेहरु हाकाहाकी ठगिदा पनि रातिको एक बजे हाँसीखुसी घाेक्राे फुलाएर बासिरहेकै छन् । मदिरापान नसा सेवन अधिक धाेक्ने गर्छन् । सायद ठगिनुकाे पीडा भुल्नलाई पाे याे मार्ग अवलम्बन गरेका हुन् कि किन हाे ठम्याउन मुस्किल परिरहेको छ ।

तेत्राे ठूलो बसमा सारा सिट भालेलाई छाेडेर एक सिट चाहिँ महिलालाई छुट्याएका हुन्छन् शायद थिचाेमिचाे बक्रदृष्टि र सीमा उल्लंघनबाट संरक्षण दिन पाे याे सुत्र बजारमा ल्याएका हुन कि कसाे हाे कुन्नि ।

भालेले लगाउने टाेपी, जुत्ता, त फरक थियो तर अहिले त भाले माेजा, भाले माेबाईल, भाले छाता, भाले जकेट, भाले सिक्री, गर्दागर्दै हरेक कुरा भालेमय हुँदा महिलाकाे चित्त दुख्नु अनर्थ हाेइन । तर भालेले अनुशासनकाे धर्म छाेड्दा महिलाहरु पेलिनु हेपिनु मात्रै हाेइन भालेकाे बाहुबलबाट मारिनु चाहिँ भालेकाे धर्म, रहर हाे कि या बाध्यता ? त्यसैले हामीले सँधै हेक्का राखाैं भाले अप्राकृतिक ढंगले बेढंगसँग राति एक बजे बास्दै अशुभकाे पूर्वसंकेत गरिरहेको हुन्छ ।

यसमा अध्ययनशील अध्यताहरुले भालेकाे आमासय अण्डाशय, डण्डासयकाे मात्र हाेइन सयकासय अवयवकाे अध्ययन अनुसन्धान गरेर शाेधार्थीले शाेधपत्र नै तयार गर्ने हाे कि के गर्नेहाेला ? भालेकाे भलाई सुविधा भन्दा पनि म त दुविधामा पाे छु त । लु न भालेकाे मुक्तिमार्गकाे जुक्ति बक्सिस हाेस हजुर ।

०००
फूलबारी ११ पाेखरा कास्की ।
फाेन:- ९८०६६७७५९४