नेपाली हास्यव्यङ्ग्य अनलाइन पत्रिका

कृष्णप्रसाद पौडेल ‘जस्ताघरे’ :

आफ्ना सुता सुत वधू सब प्राण ठान्छन् ।
सङ्‌कष्टको समयमा पनि ख्याल राख्छन् ॥
आमा बुबा हजुरबा भज राम नाम ।
यी ज्येष्ठ नागरिकमा छ सदा प्रणाम ॥ – १

वृद्धा र वृद्धजनका सुविचार खुल्छन् !
भोगाइका पलहरू मननीय हुन्छन् ॥
पाका भए मनुजका घर बन्छ धाम ।
यी ज्येष्ठ नागरिकमा छ सदा प्रणाम ॥ – २

बाबा मुमा गगनझैँ रविझैँ उँचा हुन् ।
मानौँ यिनै शिखरका शिवपार्वती हुन् ॥
पारौँ खुसी अब बुबा र मुमा तमाम ।
यी ज्येष्ठ नागरिकमा छ सदा प्रणाम ॥ – ३

सन्तान बाहिर गए घर गाउँ छोडे ।
मातापिता हजुरबा सब जीर्ण रोए ॥
मानौँ दया भर दिऊन् नभ जून घाम ।
यी ज्येष्ठ नागरिकमा छ सदा प्रणाम ॥ -४

सङ्‌घर्षका अनुभवी शुभकर्म रोप्ने ।
वृद्धा र वृद्धजन हुन् भय दूर गर्ने ॥
छन् कर्ममा सफरमा चिरकालसम्म ।
यी ज्येष्ठ नागरिकमा छ सदा प्रणाम ॥ – ५

पाका गरा विपिनमा श्रम पोख भन्छन् ।
सन्तानका प्रगतिमा खुब ध्यान दिन्छन् ॥
राधा बसून् हृदयमा जप कृष्ण श्याम ।
यी ज्येष्ठ नागरिकमा छ सदा प्रणाम ॥ – ६

०००
वि . न . पा .- ४, बट्टार, नुवाकोट !