नेपाली हास्यव्यङ्ग्य अनलाइन पत्रिका

कृष्णप्रसाद पौडेल ‘जस्ताघरे’ :

हुन् पिता मनुजका, हितकारी ।
हुन् मुमा भगवती, महतारी ॥
जेष्ठका कठिनका, पल टाल ।
वृद्धका सकसको, गर ख्याल ॥ – १

वृद्धका मगजले, शुभ ठान्छ ।
चित्तले नयनले, सम देख्छ ॥
जेष्ठका तन नहून्, सुसुपाल ।
वृद्धका सकसको, गर ख्याल ॥ – २

वृद्ध,बालजन हुन्, शिवतुल्य ।
मान्नुपर्छ नरले, कटु सत्य ।।
जेष्ठका सँग रहून, शुभकाल ।
वृद्धका सकसको, गर ख्याल ॥ – ३

छन् पिता घर भने, छ उमङ्ग ।
छिन् मुमा यदि भने, मन दङ्ग ॥
भोग्दछन् सुत सुता, शुभलाभ ।
वृद्धका सकसको, गर ख्याल ॥- ४

दृष्टि जाँगर कठै, बल छैन ।
बाल वृद्ध नहुने, मनु हुन्न ॥
छन् अशक्त र लुला, पदचाल ।
वृद्धका सकसको, गर ख्याल ॥ – ५

पार्वती भगवती, भज राधा ।
बोल नम्रपनले, गर श्रद्धा ॥
जेष्ठका पिर दशा, पर फाल ।
वृद्धका सकसको, गर ख्याल ॥ – ६

०००
बट्टार, नुवाकोट