नेपाली हास्यव्यङ्ग्य अनलाइन पत्रिका

बिन्दु दाहाल मुकदर्शक :

चियोचर्चो अरूकै छ आफ्नो मानो पचाउन
सकेनौँ बुद्धिजीवीले आफ्नो सान बचाउन । १

फूल रोपे विरोधै छ उखेले नि विरोध छ
नेपालीको गयो बुद्धि पेटमा तुच्छ क्रोध छ । २

देशभन्दा ठुलो पार्टी ठान्नेहरू खरा भए
हिजोका ढोडका तोक्मा आजभोलि दह्रा भए । ३

न हिजो सभ्य संस्कार सिकाए नमुना बनी
तिनै नै अहिले खोक्छन् चुँडाई व्यर्थ कन्दनी । ४

आफन्तवादको भोटो सिलाए दलले हिजो
परिणाम सबै निस्क्यो गणतन्त्र भयो झिँजो । ५

सत्तामा जहिले साँढे डुक्रेर बस्न खोज्दछन्
थोरैले मात्र यो देश हितका निम्ति सोच्दछन् । ६

उम्किए तिनका कुर्सी छुसी बानी र ढङ्गले
कुना पसी रुँदै छन् हा ! तिम्ल्याहा धूर्त मङ्गले । ७

हुन्छ्न् मन्त्री महा चोर चुनावमा जितेपछि
देश बनोस् कहाँबाट लार्भा जस्तै घिचेपछि । ८

हुन्छ्न् डाँका यहाँ काका साइनोमा परेपछि
सबै उल्टो कुरा गर्छन् कुर्सीबाट झरेपछि ।९

दरबार हुनेले नै झुप्राझुप्री उडाउँछन्
दुखीका माथमा चिल्लो रेलगाडी गुडाउँछन् । १०

०००
दमक, झापा