बिन्दु दहाल ‘मूकदर्शक’मातापिता निधि दुई
कोही कुनै तरहले नबनुन् पराई पीडा खपेर घरमा नबसुन् डराई । हुन् तीर्थझै घरहरू सुखशान्ति आउन् मातापिता निधि दुई घरमै रमाउन् ।।
बिन्दु दहाल मूकदर्शक :
आमा रहस्यमय छिन सब सृष्टि गर्ने
बाबा धराभरि सधैं रजबीज छर्ने ।
आमाबुबा युगलले घरती सजाउन्
मातापिता निधि दुई घरमै रमाउन् ||१||
आमा विशाल नभ हुन् सबकी छहारी
बाबा सुदर्शन धरा वसुधा विहारी ।
हाम्रो धरा पवित होस् सुखले भराउन्
मातापिता निधि दुई घरमै रमाउन् ॥२॥
सर्वोच्च छन् हृदयले मनकामनाले
माधुर्यले विनयले कृत सम्झनाले ।
धर्ती समुन्नत सधैं मनले गराउन्
मातापिता निधि दुई घरमै रमाउन् ॥३॥
सम्मान पाउन सकुन् घरमा मुमाले
पाउन् खुसी हरघडी गृहमा बुबाले ।
सन्तानको सयलमा मृदुभाव पाउन्
मातापिता निधि दुई घरमै रमाउन् ।॥४॥
कोही कुनै तरहले नबनुन् पराई
पीडा खपेर घरमा नबसुन् डराई ।
हुन् तीर्थझै घरहरू सुखशान्ति आउन्
मातापिता निधि दुई घरमै रमाउन् ।।५।।
०००
दमक, झापा
Subscribe
Login
0 Comments
Oldest
