नेपाली हास्यव्यङ्ग्य अनलाइन पत्रिका

बिन्दु दाहाल मूकदर्शक :

मान्छे ज्येष्ठ हुँदा विभिन्न पलमा संज्ञानले ज्ञानले
थुप्रै बुद्धिविवेक टिप्छ मनले अर्पी हियो ध्यानले
लड्दा फेरि जुरुक्क उठ्छ र सधैँ थाल्नेछ यात्रा पुनः
पाका सारद हुन् विचार पथका चेलाहरू हो सुन ।।१

कालो केश सफेद हुन्न सजिलै भोगिन्छ झन् हन्डर
पाका त्याग गरी सधैँ विनयले हुन्छन् हिरो नम्बर
फाट्छन् वस्त्र शनै: शनै: वयसँगै बढ्ने छ शिक्षा गुन
पाका सारद हुन् विचार पथका चेलाहरू हो सुन ।।२

मान्छेको जति बढ्छ आयु उसले देख्ला अनेकौँ कुरा
चढ्ने गर्छ हिमाल उच्च गिरि ती सत्बुद्धिका टाकुरा
पाका, सागरको समान गरिमा देखिन्छ उस्तै धुन
पाका सारद हुन् विचार पथका चेलाहरू हो सुन ।।३

आफ्ना सन्ततिको निमित्त यिनले खट्छन् बनी निर्मम
छानी मार्ग फराक हिँड्न यिनले देखाउँछन् उत्तम
हुन्छन् ती परिपक्व सर्व गुणका सर्वज्ञ छैनन् कुन ?
पाका सारद हुन् विचार पथका चेलाहरू हो सुन ।। ४

लेख्छन् नीति अकाट्य यी नियमका संस्कारका पालक
आफ्नो धर्म परम्परा लवजका आदर्शका चालक
शिक्षा बाँड्न सिपालु छन् मगजले आकाश जान्छन् छुन
पाका सारद हुन् विचार पथका चेलाहरू हो सुन ।। ५

०००
दमक, झापा