नेपाली हास्यव्यङ्ग्य अनलाइन पत्रिका

बिन्दु दहाल मूकदर्शक :

छन् अनेक रङ्गिला सुपुष्प कुञ्ज बागमा
माहुरी र भृङ्ग मस्त छन् सबै परागमा
दृश्य रम्य छन् सबै वसन्तले फुलाउँदा
वृद्धमा खुसी फुलोस् वसन्तले भुलाउँदा ।।

वृक्ष टम्म छन् खुदै वसन्त दिव्य छाउँदा
सन्त साधु मक्ख छन् गुराँस हेर्न पाउँदा
देश रम्य देखियो वसन्त गाउँ आउँदा
वृद्धमा खुसी फुलोस् वसन्तले भुलाउँदा ।।

छन् विचित्र सिर्जना तमामका छटाहरू
पूर्ण हुन् सबै कुरा हियारका अरू अरू
को खुसी हुँदैन यो वसन्त हेर्न पाउँदा
वृद्धमा खुसी फुलोस् वसन्तले भुलाउँदा ।।

आजभोलि देशको मधेसमा हिमालमा
छन् सबै विमुग्ध ती मनुष्य नादचालमा
कामधेनु यो वसन्तले सुधा बगाउँदा
वृद्धमा खुसी फुलोस् वसन्तले भुलाउँदा ।।

सिर्र सिर्र वायुले हियार शान्त पार्दछ
प्रीतका विहारले प्रगाढ प्रेम सार्दछ
याम यो वसन्तको बहार सौम्य पाउँदा
वृद्धमा खुसी फुलोस् वसन्तले भुलाउँदा ।।

०००
दमक, झापा