नेपाली हास्यव्यङ्ग्य अनलाइन पत्रिका

दुष्यन्त भट्टराई :

आफन्त सन्ततिसँगै सुखदःख साटुन्
पीडा भुलेर परिवार खुलेर हाँसुन् ।
आनन्द भाव मनमा दरिलो जगाउन्
मातापिता निधि दुई घरमै रमाउन् ।।१।।

के के छ आज भन जीवनमा खजाना
आनन्द, हर्ष, सुखभोग सबै जनामा ।
दिन्छन् सदैव अभिभावकले बुझाउन्
मातापिता निधि दुई घरमै रमाउन् ।॥२॥

सद्भावका किरणले झलमल्ल पारून्
सन्ताप, दुःख, भय जीवनका लघारुन् ।
आवेग रागरिस बन्धन नै चुडाउन्
मातापिता निधि दुई घरमै रमाउन् ।।३।।

आमा समान जगमा ममता हुँदैन
बाबाविना शिशु स्वयं अहँ हुर्किंदैन ।
सम्मान भाव सब सन्ततिले जगाउन्
मातापिता निधि दुई घरमै रमाउन् ।।४।।

बालूँ म दीप मनमा शुभ भावनाले
लागूँ म धर्मपथमा शुभ चाहनाले ।
संस्कारमाथि सब कर्म फुलुन् फुलाउन्
मातापिता निधि दुई घरमै रमाउन् ।।५।।

०००
मेचीनगर, झापा