नेपाली हास्यव्यङ्ग्य अनलाइन पत्रिका

दुष्यन्त भट्टराई :

आज नेपालमा हाल बेहाल छ
वृद्धमा सुस्तरी आउँदो काल छ
एउटा मात्र विन्ती सुनून् शङ्कर
वृद्धवृद्धा सबै शम्भु रक्षा गर ।१।

गर्न सन्तानको हर्षको सञ्चय
खर्चिए जो थियो साथमा वैभव
आज छैनन् सँगै दूरको के भर
वृद्धवृद्धा सबै शम्भु रक्षा गर ।२।

उच्च संस्कारले हुर्किएका थिए
आज खै के भयो सत्य नै बिर्सिए
हो कलीकालको देख्छु सम्बत्सर
वृद्धवृद्धा सबै शम्भु रक्षा गर ।३।

हातखुट्टासँगै ज्यान गल्दा पनि
चित्तमा आसको दीप बल्थ्यो सधैँ
दूरको धिप्धिपे दीपको के भर
वृद्धवृद्धा सबै शम्भु रक्षा गर ।४।

शम्भु कैलाशवासी तिमी ईश्वर
साथमा पार्वती साथ नन्दीश्वर
कण्ठले गर्छु यो प्रार्थना शङ्कर
वृद्धवृद्धा सबै शम्भु रक्षा गर ।५।

कालका रूपको गर्दछौ धारण
सृष्टि संहारका हौ तिमी कारण
एक मुठ्ठी दया राख बाघम्बर
वृद्धवृद्धा सबै शम्भु रक्षा गर ।६।

०००
मेचीनगर, झापा