नेपाली हास्यव्यङ्ग्य अनलाइन पत्रिका

दुष्यन्त भट्टराई :

सन्तान दु:ख निमिट्यान्न बनाउँछन् जो
पोखेर हर्ष अनुहार हँसाउँछन् जो
त्यस्ता अमूल्य गहना बुझियून् तमाम
यी ज्येष्ठ नागरिकमा छ सदा प्रणाम ।

शिक्षा दिएर नित नैतिकता उचाल्छन्
संस्कारले मुलुक उज्ज्वल पार्न थाल्छन्
त्यस्ता धरोहर बुझौँ र झुकौँ तमाम
यी ज्येष्ठ नागरिकमा छ सदा प्रणाम ।

स्वार्थी हुँदैन ममता यिनको कसैमा
त्याग्छन् समस्त सुख सन्ततिका खुसीमा
सन्तान हो बुझ यिनी सब तीर्थ धाम
यी ज्येष्ठ नागरिकमा छ सदा प्रणाम ।

हाँक्छन् सुमार्ग घरको रथ नित्य जल्ले
साँच्छन् भविष्य सुख सन्ततिको क्रमैले
ब्रह्मा यिनै शिव यिनै बलराम राम
यी ज्येष्ठ नागरिकमा छ सदा प्रणाम ।

मिल्दैन भोलि यिनको अनमोल काख
मिल्दैन ढुक्क बनिने सहयोग साथ
बुझ्दै महत्त्व गर आदर, होस् इमान
यी ज्येष्ठ नागरिकमा छ सदा प्रणाम ।

०००
मेचीनगर, झापा