नेपाली हास्यव्यङ्ग्य अनलाइन पत्रिका

रमेश समर्थन :

१.
श्रमिकका सुकेका ज्यान र ओठका पाप्रा देखिएलान्‌
या कुनै यक्षिणीका नग्न धवल साप्रा देखिएलान्‌
भ्यु टावरबाट दुरबिन लगाएर हाम्रो बस्तीमा नहेर्नुस्‌
भोका नाङ्गा ज्यानहरू र उदाङ्गा छाप्रा देखिएलान् ।

२.
मान्छेको मन नै त्यो तनभन्दा प्रिय हुन्छ
कहिले भने धन पो मनभन्दा प्रिय हुन्छ
तन, मन र धनभन्दा प्रिय त हुन्छ जीवन
कहिलेकाहीँ मृत्यु पनि जीवनभन्दा प्रिय हुन्छ ।

३.
घृणाको हैन, हामीलाई चोखो प्रीतको खाँचो छ
त्यसै प्रीतका निम्ति निःस्वार्थ मितको खाँचो छ
कोही कसैका लागि मर्न त के हार्न पनि चाहँदैन
यो खेल हो, यहाँ सबैलाई आफ्नै जितको खाँचो छ ।

४.
धृतराष्ट्र फेरियो, दुर्योधन र दुश्शासन फेरियो
घोषणा र भाषण फेरियो अनि आश्वासन फेरियो
पात्र र व्यवस्था फेरिए तर हाम्रो अवस्था फेरिएन
हो, फेर्छौँ भन्नेहरूको भने आसन र रासन फेरियो ।

०००
रूपन्देही