नेपाली हास्यव्यङ्ग्य अनलाइन पत्रिका

दुष्यन्त भट्टराई:

जाँड होस् चुरोट होस् पिए सकिन्छ मानिस
भेटघाटमा यही लिए सकिन्छ मानिस
बिग्रिने सुधारिने अलग्ग गर्छ ज्ञानले
शक्ति घट्छ व्यक्तिको धुवाँ र मद्यपानले ।

हर्ष होस् कि दु:ख होस् पिएर को कता लुके
सानमान दाम जो सकिन्छ चेतना गुमे
जोश मिल्छ होस छिन्छ एक बूँद पानले
शक्ति घट्छ व्यक्तिको धुवाँ र मद्यपानले ।

वृद्ध जो निवासमा दुखेर देह जीर्ण छन्
पुत्र मद्यपानले गलेर झन् विदीर्ण छन्
चारकोष दूरको भएर हर्ष काम के ?
शक्ति घट्छ व्यक्तिको धुवाँ र मद्यपानले ।

देश होस् विदेश होस् यही छ कष्टकारक
जात धर्म कर्ममा यही छ एक मारक
एक हौँ कुरा बुझौँ समेटियोस् विधानले
शक्ति घट्छ व्यक्तिको धुवाँ र मद्यपानले ।

साँझ होस् बिहान होस् सधैँ समान नाम होस्
व्यक्तिमाथि व्यक्तिको सदैव उच्च मान होस्
चित्र होस् चरित्र होस् चिनाउने छ कामले
शक्ति घट्छ व्यक्तिको धुवाँ र मद्यपानले ।

०००
मेचीनगर, झापा