नेपाली हास्यव्यङ्ग्य अनलाइन पत्रिका

कृष्णप्रसाद पौडेल ‘जस्ताघरे’:

आफ्नै अङ्ग हियारझैँ नयनझैँ, सन्तान हुन् भन्दछन् ।
भोको पेट लिई हजार पिरका, पोका खुबै बोक्दछन् ॥
पाका सन्ततिका सह्यार विधिका, मानौँ कलाकार हुन् ।
हाम्रा पूज्य बुबामुमा हृदयका,सर्वोच्च आधार हुन् ॥ -१

बा आमा सब बाल शिष्यजनका, वात्सल्यका मूल हुन् ।
चोला मानिसको दिई जतनले, जन्माउने ईश हुन् ॥
आफ्ना चाह भुली कडा श्रम गरी, हुर्काउने प्यार हुन् ।
हाम्रा पूज्य बुबामुमा हृदयका, सर्वोच्च आधार हुन् ॥ -२

पाका ज्ञान र शिल्पका सगर हुन्, सत्कर्मका सार हुन् ।
वार्ता मेलमिलापका सहजका, सद्भावका दीप हुन् ॥
पाका चेतन तत्त्वका शिखर हुन्, मानौँ भला चन्द्र हुन् ।
हाम्रा पूज्य बुबामुमा हृदयका, सर्वोच्च आधार हुन् ॥ -३

उम्दा कृत्य सुमार्गका प्रगतिका, पाका बडा यार हुन् ।
साँचो दृष्टि सुधारका मिलनका, भोगाइका श्रेष्ठ हुन् ॥
वृद्धावृद्ध सुसभ्यका सुमनका, मानौँ कडा भक्त हुन् ।
हाम्रा पूज्य बुबामुमा हृदयका, सर्वोच्च आधार हुन् ॥ – ४

राम्रा मौलिक सौम्य सिर्जनकला, पाका सधैँ रच्दछन् ।
आफ्ना सन्तति उच्च आचरणले, चल्ने गरून् भन्दछन् ॥
आफ्नो वंशपरम्परा चलनको, पाका मियो शक्ति हुन् ।
हाम्रा पूज्य बुबामुमा हृदयका, सर्वोच्च आधार हुन् ॥ – ५

पुत्री पुत्र वधू समग्रजनमा, सन्देश फैलाउँछन् ।
फाट्छन् चन्द्र धरा भने पनि सधैँ,खाँटी कुरा बक्दछन् ॥
यस्ता मातृ पिता समाज घरका, मानौँ उँचा ताज हुन् ।
हाम्रा पूज्य बुबामुमा हृदयका, सर्वोच्च आधार हुन् ॥ – ६

०००
वि. न. पा. -४ , बट्टार, नुवाकोट !