नेपाली हास्यव्यङ्ग्य अनलाइन पत्रिका

कोमल भट्ट :

निष्ठा न्याय निसासिए मुलुकमा निष्पक्षता नाङ्गिए
भ्रष्टाचार बढ्यो दुराशय बढे भण्डार खाली भए
चिन्ताग्रस्त सदैव शासकहरू भर्ने कसोरी घर
रोजिन्दा छलछाम झूटमुटले सच्चाइ भो जर्जर ~१

भर्ती केन्द्र हुँदै निकाय भरिए आफन्त सारा हुली
उम्दा बाहिरिए अयोग्य कतिले फेरे छिटै काँचुली
नातेदार भए पदोन्नति हुने तक्मा तरक्की पनि
छोडे देश युवाहरू सकलले जागीर खोजौँ भनि~२

बस्ने रौब रबाफले महलमा सौन्दर्यका शानका
ओजस्वी अभिमान शोख सुविधा बेजोड सम्मानका
चोखो स्वेत कमाइबाट जगमा मिल्ला कहाँ वैभव
भ्रष्टाचार गरेर मात्र सहजै होला सबै शम्भव ~३

वाचा भङ्ग भए विकाश थलिए उच्चा भए लालच
बिग्र्यो बुद्धि विवेक चिन्तन सफा आँधो भयो आदत
काला क्लेश बढे इमान सकिए आकासिए चाहना
पापाचार जताततै बिगबिगी खोटा भए कामना ~४

चोख्याइन्छ कुकर्म जे जति गरोस् आफन्तले हर्दम
कोसेली चुलिँदा प्रशन्न अगुवा मेवा दिने उत्तम
रोक्नै पर्दछ देशले अति छिटो दुष्कर्मका ज्यादती
भ्रष्टाचार तमाम अन्त्य नभए भोग्छौँ सबै दुर्गति~५

०००
चन्द्रगिरि – १३ , काठमाडौँ ।
हाल :- न्युयोर्क, अमेरिका ।