नेपाली हास्यव्यङ्ग्य अनलाइन पत्रिका

तत्पर छन्
अर्जुन बन्न
आयुधका पुजारीहरू
र त
देखिन्छन् सधैं
गोटी बन्ने प्रतिस्पर्धामा
उत्खनित चिहानमाथि उभिएर
गारो छ
रोमान्चित हुनु
भय छ हृदयमा
कोटी कोटी कर्णहरूको
कतै
पधेंरामा भेटिन्छन्
निधारको घाउ पखालिरहेका
अभिशप्त अश्वत्थामाझैं
कतै
एक्लो अभिमन्युलाई
तड्पाई तड्पाई मारेको
स्मृतिले
अविघातित भएर
फडफडाउँछन्
माउसुलीको चुँडिएको पुच्छरर्झें
फेरि कहिले
भौंतारिन्छन्
मायावी कृष्णको खोजीमा
र चाहन्छन्
निर्बिघ्न आशीर्वाद
हर मुद्धामा
दौडन्छन्
मथुरा र द्वाराकातिर
निर्देशन दिन तयार छन् कृष्ण
अनि
सुन्छन् मन्त्र हतार हतार
श्रीमद्भगवद् गीता
तर चाहिएका श्लोक मात्र–
जित्यौ भने पृथ्वीमा राज्य,
हार्यौ भने स्वर्गको वास !
तसर्थ लड !
तर
अर्जुन,
खुकुलो छ तिम्रो गाण्डीव
संकुचित छ तिम्रो दर्शन
कर्कश छ तिम्रो सङ्गीत
र सबैभन्दा बढी
निर्दोष जनताको
रगत र आँसुले भिजेको छ
तिमी हिँड्ने
हर दिशाको बाटो
कहाँ टेक्छौ पाइला ?
काठमाडौं