नेपाली हास्यव्यङ्ग्य अनलाइन पत्रिका

सानो छँदा
भोजभतेरमा जाँदा ठूलै जमघट हुन्थ्यो
इष्टमित्र, साथीभाइ उसका अघिपछि गर्दै
भलाकुसारी गर्थे
अनि हँसीमजाक गर्थे
तत्कालीन परिवेशका
कुरा गर्थे
साह्रै रमाइलाका साथ भोजभतेर
अनि जमघट विसर्जन हुन्थे ।

तर आजकल
उसका बालसखाहरू ऊसँग टाढिएका छन्
हरेक भोज भतेरहरूमा उसलाई पनि
निम्ता हुन्छन्
जसरी बाल्यकालमा हुन्थ्यो ।

ऊ हरेक निम्ताको आदर गर्दै
निम्ता स्वीकार गर्छ
र, जान्छ निम्ता मान्न
तर ऊ कहिल्यै खुसीसाथ
निम्ता मानेर फर्केको छैन ।
पहिलेको जस्तो
बालसखाबीच भलाकुसारी
हँसीमजाक
अनि जमघट हुन सकेको छैन ।

ऊ ताजुब मान्छ
वर्तमान संस्कार देखेर
ओठ निचोर्दा दूध निस्कने बेलाकाहरू
सोमरसमा लिप्त छन्— भोजहरूमा
अनि लिप्त छन् तथाकथित मोजमस्तीमा
अर्धनग्न पहिरन
त्यसमा पनि पारदर्शी !
पारदर्शिताको फाइदा उठाउँदै
अझै उत्साहित छन् युवाहरू
गाँजा र चुरोटको सर्को लगाउँदै
झुम्मिएका छन् तिनै युवतीहरूका समीप
यसैले ऊ विक्षिप्त बन्छ
भोजभतेर अनि कथित पार्टीहरूमा !

हिजोका बालसखाहरू मस्त छन् मदिरामा
ऊ मदिरा छुँदैन
यसको मतलब खाँदैन
र त एक्लो छ भोजभतेरमा
उसलाई मनोरञ्जनको त के कुरा
बोझा ठान्छ भोजभतेर अनि पार्टीमा ।
आजकल लाग्न थालेको छ उसलाई
मदिरा रहेछ—
मित्र, सखा भनेको त
मदिरा नै सच्चा मनोरञ्जनको साधन रहेछ
मिल्ने बालसखाहरू मदिरालाई
मित्र बनाउन थालेछन्
र उसलाई घेर्ने र हँसीमजाक गर्नेहरू
आज पनि घेर्दे हँसीमजाक गर्दै
पाखेको संज्ञा दिई धिक्कारी रहेछन्
ऊ भने ती घेराबाट
फुत्किने असफल प्रयास गरिहेछ
या समाजको नियति देखेर
आफूले आफैलाई धिक्कारी रहेछ ।

भासिएको छ
सान र मान नै आज समाजको
रक्सी र जुवामा
त्यसैमा लिप्त हुनेहरू
ठुलाठालु घोषित
ऊ भने समाजमा
सबैभन्दा नीच, दरिद्री भई
गरिरहेछ जीवन दुखजिलो निर्वाह ।

निम्तोपत्र र निम्ताको खोजी गर्ने ऊ
आजकल निम्तादेखि भागिरहेको छ
भोजभतेरहरूमा
जमघट गर्न
उत्कट चाहना राख्ने ऊ
थालेको छ बस्न आजकल एक्लै घोरिएर ।
गोरखा