नागरिक

म असफल पति
र असफल पिता
न असल छोरा बन्न सकें
न असल नागरिक
शायद जानी नजानी
बा(आमाको मन दुखाएको
सजाय भोग्दैछु
शायद अंगिकृत नेताहरूलाई
अभिभावक बनाएको
अभिशाप भोग्दैछु ।
न बाटोमा जुलुस बनेर
तोडफोड गर्न सक्छु
न मानिस मार्न वा जलाउन सक्छु
न बाआमालाई खर्पनमा राखेर
तीर्थ यात्रामा निस्किन सक्छु
न असफलताको बुईं चढेर
आत्महत्या नै गर्न सक्छु ।
हरेक अभाव र अपमानहरूलाई
सहजै अंगालो हाल्दै
बाँच्न बानी परिसकेको
म नेपालको नागरिक हूँ ।