नेपाली हास्यव्यङ्ग्य अनलाइन पत्रिका

भक्तपुर, कमलविनायकको बसपार्कसँगै कथाकार धनमान श्रेष्ठको निजी निवासमा ‘कथाकारको कथनी’ शीर्षकमा कथा यात्रा समूहले साहित्यिक जमघट गरेको खबर छ ।

सिद्धहस्त कथाकारहरूसँग नियमित रूपमा जन्मदिनको सेरोफेरोको भेटघाटलाई कथा वृत्तलाई परिवारसँग जोड्ने माध्यमको रूपमा समेत लिइएको छ । कथा लेख्नेहरूले आफूले लेखनको क्रममा भोगेको अनुभव मात्र होइन, कथाका मान्य सिद्धान्त, दर्शन र साहित्यिक पर्यावरणको समेत विमर्श गरिने यो कार्यक्रमले अलग पुस्ताका लेखकहरूलाई जोड्ने सतत् प्रयास गर्ने गरेको छ ।

यही फागुन ३ गते सम्पन्न उक्त कार्यक्रममा लेखक साहित्यकारहरू ध्रुव मधिकर्मी, डा. योगेन्द्र प्रधानाङ्ग, विष्णु केशरी, कृष्ण कक्षपति, हिरण्य प्रताप, हरिगोविन्द मुल्मी लगायतको उपस्थिति रहेको थियो ।

सो कार्यक्रममा डा. योगेन्द्र प्रधानाङ्गले समाज जोड्ने उद्धेश्य लिएको लेखकले आफ्नो साहित्यिक कदको मापन परिवारभित्र स्थापित गर्न, लेखको योगदानलाई सामाजिक मूल्य प्रदान गर्न सानो स्तरको भए पनि यस्ता कार्यक्रमले ठूलो महत्व राख्ने बताउनुभयो ।

कथाकार धनमान श्रेष्ठले रामेछापको साँघुटारमा स्वास्थ्यकर्मीको रूपमा पुगेपछि शुरू भएको आफ्नो साहित्यिक आरोह अवरोहको मात्र चर्चा नगरी रामेछाप जिल्लाले जन्माएका सपुत गंगालाल श्रेष्ठमाथि कसरी कथा लेखियो भन्ने रोचक प्रसङ्ग पनि सुनाउनुभयो ।

कथाकार श्रेष्ठको टाढाको सम्झना, यौटा उस्तै कथा, सम्वन्ध विच्छेद जस्ता कथा सङ्ग्रहहरूको साथमा पाँच वटा कृतिहरू प्रकाशित छन् । सिर्जना अभियान समाजको अध्यक्षको रूपमा समेत क्रियाशील श्रेष्ठ विभिन्न साहित्यिक संस्थाहरूमा आबद्ध रहनुभएको छ ।

नेपाली कथा साहित्यमा क्रियाशील रहेको कथा यात्रा समूहमा कुमार काफ्ले, दीपक लोहनी, पवित्रा अधिकारी, प्रमोद प्याकुरेल, विश्‍व कुइकेल, हरिश कल्पित र डा. हिमलाल श्रेष्ठ रहेका छन् ।

०००
समाचार श्राेत : शब्दपथ