नेपाली हास्यव्यङ्ग्य अनलाइन पत्रिका

रोङ, इलाम । भाषाशास्त्री महानन्द सापकोटाको १३१ औँ जन्मजयन्ती इलाम जिल्लाको रोङ गाउँपालिका -५, स्थित देवानछाप डाँडामा सदाझैँ यस पटक पनि धुमधामका साथ सम्पन्न भयो ।

नेपाली साहित्यका मूर्धन्य स्रष्टा माटोप्रिय कवि, निबन्धकार, दार्शनिक कवि, सम्पादक र नेपाली भाषा प्रचारक सङ्घको परिकल्पनाकारको केन्द्रमा मूलतः नेपाली व्याकरण र भाषाको विशेष अध्ययन गर्ने (भाषावैज्ञानिक) व्यक्तिको रूपमा उपस्थित स्रष्टाहरूबाट चिनाउने प्रयास भयो ।

प्रमुख अतिथिबाट तुलमा लेखिएका अक्षरहरू पढेर उद्घाटन गरिएको कार्यक्रममा दिवङ्त स्रष्टाप्रति एक मिनट मौनधारण गर्दै सामुहिक राष्ट्रगान गाई देशलाई सम्झने काम पनि भएको हो । महानन्द साहित्य केन्द्रका अध्यक्ष बृहस्पति खतिवडाको अध्यक्षता, श्री महेन्द्र रत्न बहुमुखी क्याम्पस इलामका सेवानिवृत्त उप-प्राध्यापक केशबहादुर राईको प्रमुख आतिथ्य, विशिष्ट अतिथि रोङ गाउँपालिकाका अध्यक्ष मणिकुमार स्याङ्बो, विशेष अतिथिहरू उपाध्यक्ष विष्णुमाया भुजेल, शिवकुमार पौड्याल, श्रुति तामाङ, वडा नं ५ का वडाध्यक्ष दलबहादुर पुलामी र अतिथिहरूमा पूर्णचन्द्र विवश, नुरज भट्टराई “नदी”, मोक्षकुमारी खतिवडा, देवीप्रसाद खतिवडा र विभिन्न विद्यालयका प्रअ तथा शिक्षक प्रतिनिधिहरूलगायतका उपस्थिति रहेको थियो ।

कार्यक्रममा कविता वाचन , प्रतियोगितात्मक नृत्य र महानन्द सापकोटाको साहित्यिक योगदानको संक्षिप्त चर्चा पनि भएको थियो । कविता वाचनतर्फ टङ्क विकल्प, मोक्षकुमारी खतिवडा , नुरज भट्टराई “नदी”, शिवराम धामीलगायत रहेका थिए भने प्रतियोगित्मक नृत्यमा प्रथम, दोस्रो, तेस्रो र सान्तवना हुनेहरूलाई प्रमाणपत्र र नगदसहित पुरस्कृत गरिएको थियो । यसका मूल्याङ्कन शिक्षकद्वय भोगेन्द्र खड्का र शशिधर लामिछानेले गरेका थिए ।

त्यसैगरी शिवकुमार पौड्याल , रोङ गापाका अध्यक्ष्य , उपाध्यक्ष र कार्यक्रमका प्रमुख अतिथि केशबहादुर राई र श्रुति तामाङलगायतले आ-आफ्ना विषयवस्तुमा मन्तव्य प्रस्तुत गरेका थिए । आफूले चीन भ्रमण गरेर आएपछिको अनुभवका आधारमा संस्था महानन्द स्मृति केन्द्रलाई थप मजबुत बनाउने र भाषाशास्त्री सापकोटाले नेपाली भाषामा दिएका योगदानको उच्च मूल्याङ्कनस्वरूप नयाँ कार्यविवरण तयार पार्ने खुलासा अध्यक्ष्य स्याङ्बोले जनाए ।

कार्यक्रममा सूर्योदय सामाजिक प्रतिष्ठान , सूनपा -१०, फिक्कल इलामका सदस्य नुरज भट्टराई “नदी” ले भाषाशास्त्री महानन्द सापकोटाले नेपाली साहित्य क्षेत्रमा दिनुभएको चौतर्फी योगदानको संक्षिप्त चर्चा गरेका थिए । त्यसैगरी प्रमुख अतिथि केशबहादुर राईले संस्थामा भएका विगतका आन्तरिक घटनाक्रमको सेरोफेरो प्रमाणसहित प्रस्तुत गरेका थिए ।

करिब दुई दर्जन कविहरूको प्रस्तुति र करिब २०० सयको हाराहारी सहभागी भएका महान्दजयन्ती सफलतापूर्वक कुनै पनि झरीबादलको चपेटामा नपरी सम्पन्न भएको थियो ।

महानन्द सापकोटा स्मृति केन्द्र, रोङ-५, को आयोजनामा सम्पन्न कार्यक्रममा रमेश खतिवडाको स्वागत मन्तव्य तथा औचित्यमाथि प्रकाश र सोमनाथ पौड्यालको सहजीकरण रहेको थियो ।- नदी भट्टराई/इलाम
०००