नेपाली हास्यव्यङ्ग्य अनलाइन पत्रिका

होमनाथ घिमिरे :

के के हुन्छ हुँदैन हुन्छ कसरी आश्चर्य नेपालमा ।
काटेँ तीनबिसे पुगेँ समयले भोग्दै छु सैपालमा ।
धेरै थोक बने लडे प्रकृतिले हावा उडायो कति ।
फेरिन्छन् कसरी मुहार यसरी उल्टो छ बोली जति ।१।

बोलीबाट चिनिन्छ संस्कृति तथा संस्कार आफ्नोपना ।
कस्तो कूल रहेछ मूल थरको जानिन्छ सादा घना ।
फेर्छन् रूप सधैँ वसन्त ऋतुमा फेर्दै छ मान्छे जब ।
के के हुन्छ हुँदैन हुन्छ कसरी उद्देश्य के छन् तब ।२।

यौटै व्यक्ति कुनै कुनै दल दले फेर्छन् सधैँ रङ्गमा ।
छेपारोसरि पो बनेर अहिले चढ्दै गए अङ्गमा ।
के पो हुन्छ यहाँ हुँदैन कसरी सम्पूर्ण सम्भावना –
देख्दै छन् अहिले भनौँ म जसरी के हुन्न नेपालमा ?३।

छैनन् तर्क कुनै कुतर्क भनियो लाग्छन् सबै पुच्छर ।
राम्रो रे सबमा तथापि अहिले भन्छन् बडो दुच्छर ।
कल्ले खन्छ यहाँ सदैव पथमा जाकिन्छ खाल्डो जहाँ ।
के के हुन्छ हुँदैन भन्नु कसरी विश्वास मानौँ कहाँ !४।

आफ्नो स्वार्थ मिले सबै दल यहाँ सम्पूर्ण कुम्ल्याउँछन्।
आफ्नो शक्ति पुगे सबै खल यहाँ सत्यार्थ गुल्ट्याउँछन् ।
आफ्नो भक्त भए क्षमा छ सहजै कानून उल्ट्याउँछन् ।
के के हुन्छ भनौँ हुँदैन कसरी संसार हल्लाउँछन् ।५।

बोल्छन् मात्र सधैँ हुँदैन कहिल्यै जो काम हो सार्दछन् ।
पुर्ने रात हुँदा यहाँ गगनमा औँसी भनी टार्दछन् ।
डाँका चोर रहे यहाँ मुलुकमा विद्वान् कहाँ छन् कहाँ ?
सत्ता खेल सदैव हुन्छ यसरी के हुन्न नेपालमा ???६।

०००
भरतपुर, चितवन