नेपाली हास्यव्यङ्ग्य अनलाइन पत्रिका

होमनाथ घिमिरे :

उम्दा प्रश्न ग-यौ; भविष्य अबको के हुन्छ छन् संशय !
छैनन् प्रष्ट विचार कत्ति दलको खोज्दैछ आफ्नै जय ।
होला को सरकारभित्र अबको नेतृत्व गर्ने जन ।
कस्तो सोच लिएर बढ्छ पथमा को चोर को सज्जन ।

चिन्ता धेर बढ्यो विचार मतको हाम्रो कतै सम्मति ।
होला है पछुतो विचार नहुँदा धोका अझै सन्तति ।
सुन्छौँ आज यहाँ विभिन्न थरिका बोली तथा चिन्तन ।
छुट्टिन्नन् सहजै तसर्थ अहिले को चोर को सज्जन ।

चाहे देश रहोस् नहोस् पनि कतै भन्नेहरू छन् यहाँ ।
चाहे भेष रहोस् नहोस् कति अझै ठान्नेहरू छन् यहाँ ।
आफ्नै स्वत्त्व बचाउँदै मुलकको आस्था हुने सज्जन ।
आफ्नै गौरवका सुकीर्ति सजिलै मेट्नेहरू दुर्जन ।

मेरो देश भनेर गर्व कसले गर्दैछ ऐले यहाँ ।
नेपाली हुनुमा सहर्ष कसले भर्दै प्रतिष्ठा जहाँ ।
चिन्ता गर्छ यहाँ बुझेर जसले यो राष्ट्रको अस्मिता !
सत्ता स्वार्थ कदापि छैन जसले भुल्दैन माता पिता !

बोलीमा अहिले घमण्ड कसको चढ्दैछ यो देशमा ?
स्वार्थी दम्भ विकार सोच कसको बढ्दैछ यो देशमा !
धम्की त्रास दिएर नित्य जनमा को दिन्छ झन् वेदना !
जान्नै पर्दछ सत्य यो मत दिँदा को चोर को सज्जन !!

०००
भरतपुर, चितवन
१८ माघ २०८२