नेपाली हास्यव्यङ्ग्य अनलाइन पत्रिका

होमनाथ घिमिरे :

सत्ता सोच हिजो समान नहुँदा आयो ठुलो दुर्दिन ।
भ्रष्टाचार बढ्यो जहाँ विकृतिले आकाश लाग्यो छुन !
जेन्जी वर्ग उठ्यो विरोध यसमा नेपाल जल्दै गयो ।
सत्ताच्यूत भयो निरङ्कुश स्वयं अस्तित्व ढल्दै गयो ।१।

वर्षौँ वर्ष बसेर किन्तु तिनले यो देश लुट्दै गए !
स्वार्थी मात्र बनेर दोहन गरे सर्वस्व लुट्दै रहे ।
बोली सम्म सुनेन निर्धन थिए पीडा समस्या जब ।
ज्वालातुल्य विरोध देशभरमा बढ्दै गयो वास्तव ।२।

बोल्दैनन् जनता भनेर कसरी विश्वास मात्रै छरे !
झूटो भाषणले सदैव जनका आशा सदिच्छा भरे ।
आफ्नैनिम्ति गरेर निर्णय सबै, खोक्रो बनाए जब ।
आयो यो मतदानबाट नतिजा छर्लङ्ग हो वास्तव ।३।

फर्किन्नन् जनता कदापि अबता, राम्रो नयाँले गरे !
फस्दैनन् दलका मिठा वचनमा, धोका पुराना भरे ।
खोज्दैछन् अब रोजगार सबले शिक्षा तथा स्वास्थको ।
जिम्मेवार बनेर बनेर राष्ट्र जनता अस्तित्व राख्नू छ यो ।४।

गाह्रो पर्छ अवश्य किन्तु सबले सङ्कल्प यौटै गर ।
मान्छेभित्र नयाँ अठोट मनमा विश्वास आशा भर ।
आफ्नो राष्ट्र बचाउने समय हो छोडेर सारा कुरा !
पुग्नैपर्छ अदम्य साहस सँगै गन्तव्यका टाकुरा ।५।

सक्छौँ गर्न विचार उच्च रहँदा सम्पूर्णमा एकता ।
उम्दा चिन्तन योजना मुलुकमा जानेर सम्भाव्यता।
साह्रै क्षुब्ध समाज देश जनता उत्साह नौलो भरौँ !
छोडौँ आग्रह तिक्तता हृदयका, नेपाल भन्दै मरौँ !६।

सत्तामात्र चलाउने किसिमको यो हैन निर्वाचन ।
मुद्दा खास यहाँ परिस्थिति नयाँ गर्दैछ उद्बोधन ।
मौका आज दिए समस्त जनता नेता युवाको मत ।
आओस् बुद्धि विवेक कर्म गतिलो होस् मार्ग नौलो रत !७।

०००
भरतपुर चितवन
२३ फागुन, २०८२