नेपाली हास्यव्यङ्ग्य अनलाइन पत्रिका

रूद्र ज्ञवाली :

१.
जे जसरी भएको होस्, घटना त घटनै हुन्छ
जसले दिएको भए पनि यातना यातनै हुन्छ
देखिएकै हो सप्तरङ्गी सपनाहरू जिन्दगीमा
जति नै सुन्दर किन नहोस् सपना त सपनै हुन्छ ।

२.
कहिले उठाउँदो रहेछ र कहिले थचार्दो रहेछ
डुबाउँदो रहेछ समयले र आफैँले उतार्दो रहेछ
अर्थ अँध्यारोको बुझ्दैछु रातमा दियो निभेपछि
मृत्युले एकपल्ट अपमानले पलपल मार्दो रहेछ ।

३.
मह काढ्ने हातले माहुरीको टोकाई सहनुपर्छ
किमति धातुले पनि तुलोको जोखाई सहनुपर्छ
दुख्न त दुख्छ तर मौन रहनुको कारण यत्ति हो
गुलाव मन पराउनेले काँडाको घोचाई सहनुपर्छ ।

४.
सिसा हो जीवन सिसाले एकदिन टुट्नु त छदैछ
मन भए पनि नभए पनि एकदिन छुट्नु त छदैछ
सियोले औँला घोंचेझैँ नघोंच्नुस् न हजुर बचनले
हावाले भरिएको गुब्बारा एकदिन फुट्नु त छदैछ ।

०००
भैरहवा