नेपाली हास्यव्यङ्ग्य अनलाइन पत्रिका

रूद्र ज्ञवाली :

१.
प्रत्येक कुराको आधार हुन्छ निराधार नसम्झनू
सिङ्गो ग्रन्थ हुँ पाना फाटेको अखबार नसम्झनू
नबिर्सनू तिमी, तिम्रैजस्तो दुख्ने मन छ मेरो पनि
यो मन, साप्ताहिक लाग्ने सिद्रा बजार नसम्झनु ।

२.
जो दिलको नजिक छन् तिनैले सताउने गर्छन्
सङ्क्रमण बनेर मनमा कब्जा जमाउने गर्छन्
मुस्कानको अर्थ कस्तो लगाउने हजुरकै जिम्मा
मान्छेहरू पीडा लुकाउन पनि मुस्कुराउने गर्छन् ।

३.
इज्जत भन्नु मुख लुकाउने मुखौनी रहेछ
सन्तानको अर्थ बुढ्यौलीको पनौनी रहेछ
ओत लाग्ने छानो मात्रै रहेनछ घर बुझ्दैछु
घर भनेको त भावनाहरूको बिसौनी रहेछ ।

४.
घाँटीको प्वाल हेरी मुख बाउने कला सिक्नुपर्छ
पाउनका खातिर केही गुमाउने कला सिक्नुपर्छ
जिन्दगी भन्नु त जिउने कला हो बा भन्नुहुन्थ्यो
ओढ्नीको नापमा खुट्टा तन्काउने कला सिक्नुपर्छ ।

०००
भैरहवा