नेपाली हास्यव्यङ्ग्य अनलाइन पत्रिका

दीनानाथ पोख्रेल :

कृत्य कर्म पक्रिए सदैव हुन्छ फाइदा ।
प्राप्ति टिप्न पाउँदा खुसी चुलिन्छ काइदा ।।
पूर्ण प्राप्ति कर्मका सदैव वृद्धिमा रहून् ।
स्नेहले हँसाउने बुबामुमा सुखी रहून् ।।०१।‌।

खट्दथे सधैँ उनै बढेँ म लाड प्यारमा ।
कर्म योग्य पक्रँदै पुगूँ म दिव्य द्वारमा ।।
योग्य व्यक्ति हो भनी समस्त लोकले कहून् ।
स्नेहले हँसाउने बुबामुमा सुखी रहून् ।।०२।।

बाल्यकाल सौख्यको बनाउँदै उँभो चढे ।
दु:ख कष्ट फ्याँक्न ता अनेक कर्ममा बढे ।।
ईश तुल्य व्यक्ति हुन् कुनै तनावमा नहुन् ।
स्नेहले हँसाउने बुबासमुमा सुखी रहून् ॥०३।।

भोक रोग झेल्दथे हँसाउँथे स्वसन्तति ।
राख्न नित्य हर्षमा बढाउँथे स्वयम् गति ।।
सान मान पस्कियून् विनम्र भाव पक्रियून् ।
स्नेहले हँसाउने बुबामुमा सुखी रहून् ।।०४।।

खुल्छ सौख्य मार्ग त्यो पुजेर नित्य अग्रज ।
अनन्त प्राप्ति भेटिने अनन्त खुल्दछन् व्रज ।।
दर्द कष्ट चेतका यहाँ कुनै कतै नहून् ।
स्नेहले हँसाउने बुबामुमा सुखी रहून् ।।०५।।

०००
सुम्बेक, इलाम नपा-२, इलाम