नेपाली हास्यव्यङ्ग्य अनलाइन पत्रिका

रूद्र ज्ञवाली :

१.
न त भाग्यले बिगार्छ न त छुकले बिगार्छ
न त समयले बिगार्छ, न त तुकले बिगार्छ
बोल्दा बिचार गरेर बोल्नु, आमा भन्नुहुन्थ्यो
बिगार्छ भने मान्छेलाई उसको मुखले बिगार्छ ।

२.
परे भोकै बस्नु तर कुनै बिचारको दास नहुनू
गरुङ्गो बन्दिने होडमा भिजेको कपास नहुनू
बा भन्नुहुन्थ्यो जे हुन्छ सबै राम्रै खातिर हुन्छ
एक दुई सपना ढल्दैमा कत्ति पनि हतास नहुनू ।

३.
बितेर गएको समयको यहाँ बखान गर्ने चलन छ
गरेर अपराध प्रायश्चित गर्न गोदान गर्ने चलन छ
मेरो मृत्युको अफवाह फैलाउ शुभचिन्तक हौ भने
यहाँ त मानिस मरेपछि मात्रै सम्मान गर्ने चलन छ ।

४.
स्वतन्त्रता भन्दैमा हदभन्दा बढी अराजक नबन्नू
आफैँ रचेका फर्जी पुराणका आफैँ बाचक नबन्नू
कसैको अनुपस्थिति कसैका लागि खुसी बन्छ भने
बा सम्झाउनुहुन्थ्यो, कसैको खुसीमा बाधक नबन्नू ।

५.
आज उप्रान्त कतै छोइने छैन र कसैलाई छुने छैन
जसरी रोए आफन्तहरू त्यसैरी म कहिल्यै रुने छैन
दुःखेसो पोख्दै मलामीसँग काँधमाथिको लासले भन्यो
तिमीहरूको अन्तिम यात्रामा मेरो उपस्थिति हुने छैन ।

०००
भैरहवा