नेपाली हास्यव्यङ्ग्य अनलाइन पत्रिका

रामशरण न्यौपाने “पाँचघरे”:

आँत जल्दै गयो बैँस ढल्दै गयो
गर्न यात्रा रुक्यो पाउ गल्दै गयो
यष्टि खोजी गरी माग्न थाले भर
वृद्ध वृद्धा सबै शम्भु रक्षा गर॥१॥

उच्च पाखो सबै बाढमा नै गयो
खेत गैह्री थियो त्यो घडेरी भयो
पुत्र खाडी पसे भन्दछन् को छ र?
वृद्ध वृद्धा सबै शम्भु रक्षा गर॥२॥

गर्न पूजा हिँडे वृद्ध वृद्धाहरू
हल्लिएझैँ गरी थेग्न आँधी तरु
भज्न थाले सबै लौ न गङ्गाधर
वृद्ध वृद्धा सबै शम्भु रक्षा गर॥३॥

घोर बर्सादको याम आयो यहाँ
तालझैँ लाग्दछन् मार्ग सारा जहाँ
भन्दछन् थात नै लाग्छ बग्ने डर
वृद्ध वृद्धा सबै शम्भु रक्षा गर॥४॥

गोठ छन् गाउँमा जान धेरै पर
छैन लैनो डिँगो खाइयो ठक्कर
बक्दछन् छैन त्यो दुग्ध नौनी तर
वृद्ध वृद्धा सबै शम्भु रक्षा गर॥५॥

धेर छन् देशमा आज चिन्ता लिने
देह ढल्दा कुनै छैन पानी दिने
राख्दछन् चाहना अन्त्य होस् सुन्दर
वृद्ध वृद्धा सबै शम्भु रक्षा गर॥६॥

०००
भक्तपुर