नेपाली हास्यव्यङ्ग्य अनलाइन पत्रिका

रामशरण न्यौपाने “पाँचघरे” :

रित्याए योग्यताको श्रम अधिक गरी छाला पगाली
गर्दै ल्याए सुरक्षा घर र मुलुकको तेजिलो बन्न माली
साँच्चै नै यो धरामा अधिक छ यिनको देन साथै भलाइ
हेलामा वृद्ध वृद्धा जकडिनु नपरोस् आँसुधारा बगाई॥१॥

खर्चे आफ्नो सबै नै रगत र पसिना भव्य सन्तान पाली
पौँचाएका यिनैले शिखर उपर हुन् यो गृहस्थी उचाली
बाँचून् ती ब्याज खाई हरपल अघिको कर्मको गीत गाई
हेलामा वृद्ध वृद्धा जकडिनु नपरोस् आँसुधारा बगाई॥२॥

धेरैका छन् हिँडेका सपुत र तनया देश नेपाल छाडी
पर्दा आफू बिरामी जलतक दिन नै छैन कोही अगाडि
बाँझा छन् खेतबारी हर बखत जहाँ झुल्दथे अन्न छाई
हेलामा वृद्ध वृद्धा जकडिनु नपरोस् आँसुधारा बगाई॥३॥

धेरै छन् गाउँ छोडी सुख लिन कसिँदै राजधानी पसेका
लागी नेतागिरीमा अबुझ किसिमले क्रान्ति गर्दै बसेका
गर्दैनन् मान सेवा घर बिच पहुँची पूर्वको किर्ति गाई
हेलामा वृद्ध वृद्धा जकडिनु नपरोस् आँसुधारा बगाई॥४॥

राखून् माया दयाले भर अधिक दिई स्नेहधारा बगाई
मायाले धेर पोसून् फलफुल रसिला पोष्य मिठा मिठाई
छोरा छोरी बधू नै बहुत रसिक हुन् साथ राखून् रमाई
हेलामा वृद्ध वृद्धा जकडिनु नपरोस् आँसुधारा बगाई॥५॥

०००
भक्तपुर