नेपाली हास्यव्यङ्ग्य अनलाइन पत्रिका

रामशरण न्यौपाने “पाँचघरे”:

बुबाको इसारा शिरोधार्य गर्दै
मुमाको म सेवा गरूँ पाउ पर्दै
चलोस् वृद्धसेवा खुलोस् नित्य पाथ
दसैँ मान्न पाऊँ सधैँ ज्येष्ठसाथ॥१॥

बुझेको तिनैले छ संस्कार राम्रो
तिनैबाट चल्ने त हो रीत हाम्रो
बुबाको मुमाको रहोस् उच्च गाथ
दसैँ मान्न पाऊँ सधैँ ज्येष्ठसाथ॥२॥

रहोस् वृद्धको झन् सधैँ प्रेम टेवा
मिलोस् रोज मौका झनै गर्न सेवा
झुकी पाउमा राख्न पाऊँ म माथ
दसैँ मान्न पाऊँ सधैँ ज्येष्ठसाथ॥३॥

भए वृद्ध छाता बनी ओत दिन्छन्
सबै काम जिम्मा सकेसम्म लिन्छन्
यिनै मालिका हुन् यिनै भूतनाथ
दसैँ मान्न पाऊँ सधैँ ज्येष्ठसाथ॥४॥

यिनै ज्ञान दाता यिनै कर्म दाता
यिनै कर्म गर्ने र बोल्ने विधाता
यिनै पोस्दछन् ओखती दिव्य क्वाथ
दसैँ मान्न पाऊँ सधैँ ज्येष्ठसाथ॥५॥

उनैबाट रक्षा भयो जिन्दगानी
उनैको दयाले फुल्यो यो जवानी
उनै ईश हाम्रा उनै प्राणनाथ
दसैँ मान्न पाऊँ सधैँ ज्येष्ठसाथ॥६॥

ढले वृद्ध हाम्रा सुसंस्कार ढल्छन्
यताका भुली अन्तका रीत चल्छन्
नहोऊँ म एक्लो र दुब्लो अनाथ
दसैँ मान्न पाऊँ सधैँ ज्येष्ठसाथ॥७॥

०००
भक्तपुर