नेपाली हास्यव्यङ्ग्य अनलाइन पत्रिका

रामशरण न्यौपाने “पाँचघरे”:

भन्छन् चाकर दाम खान नपुगी आ भ्रष्ट चाँडै तँ आ
भ्रष्टाचार गरेर दाम बटुली पारेर जम्मा तँ आ
दासी दास सयौँ गरीकन खडा लौ भ्रष्ट बाजा बजा
नाङ्गो नाच छ हेर्छु यो मुलुकमा पैसा विना नै म ता॥१॥

जा जा कानुन संविधान पर जा माफी गराई सजा
गर्छन् स्वागत भ्रष्टका उपरमा यो देश छोडी न जा
काण्डै काण्ड लुकाउँदै छल गरी खाता विदेशी सजा
नाङ्गो नाच छ हेर्छु यो मुलुकमा पैसा विना नै म ता॥२॥

भेडा घाँस दिई मजासित चरा साँढे लिई फाँट जा
बिक्छन् मानिस दाममा दिनदिनै किन्ने गरी आँट जा
लाछी भो सरकार नै खुद यहाँ भन्दै हकार्दै तँ जा
नाङ्गो नाच छ हेर्छु यो मुलुकमा पैसा विना नै म ता॥३॥

मासुभात दिए त दास जसरी लाग्छन् पिछा जो जता
माफी हुन्छ यहाँ हजार खत नै लाग्दैन केही पता
चोरीको धनमा रमाउनु यहाँ देखिन्छ झन् सौम्यता
नाङ्गो नाच छ हेर्छु यो मुलुकमा पैसा विना नै म ता॥४॥

नेता नै पनि भ्रष्ट नै ठिक भनी छान्छन् सबैले यता
पार्नै पर्दछ ध्वस्त देश जनता भन्छन् नि नेता जता
भ्रष्टाचार बनेर कोर फिँजियो जाऔँ कहाँ खै कता?
नाङ्गो नाच छ हेर्छु यो मुलुकमा पैसा विना नै म ता॥५॥

बाँचेसम्म त टिक्नुपर्छ पदमा छोपेर गल्ती जता
जो जो सक्दछ सोर्न दाम तिनकै खोजी छ धेरै यता
खाई अर्ब निकाल्न छर्न कनिका भन्छन् सबैले तँ आ
नाङ्गो नाच छ हेर्छु यो मुलुकमा पैसा विना नै म ता॥६॥

०००
भक्तपुर