नेपाली हास्यव्यङ्ग्य अनलाइन पत्रिका

ठाकुरप्रसाद अधिकारी :

बिग कर्पोरेट हाउसले ‘अबदेखि पानी बढुवाका हाकिम ! हुने अन्य प्रमोशन नगर्ने’ घोषणा गर्‍यो ।
कर्मचारीहरू दङ्ग परे ।

कम्पनीका पछौटेहरूले गजबै गर्नु भो ? काम छोडेर आधाजसोले मेवा मिष्ठान्नसहितको ताजाताजा बागमती स्वीट र राजभण्डारबाट ए क्लासको खाजा झिकाएर कयौं दिनसम्म भोज खाए । कयौंले बिना काममा खर्चिए । हरेकले हरेकको चोर औँला समात्दै कम्मर भाँचेर नाचगान गर्दै अबेर साझसम्म कोठा घन्काए । शरीरको प्रत्येक बुढो हड्डी अङ्ग प्रत्यङ्ग चङ्गाजस्तै चञ्चल उड्ने गरि हलुका बनाए । दर्शक दीर्घाबाट हाँसोले कोठा घन्काउदै भने कुल्ली–कवाडीको पनि ‘पानी बढुवा’मा राम्रो हुने रहेछ गाँठे !

त्यसपछि भोलिपल्ट स्टाफहरू उनै युनियन परिसरको एउटै कोठामा जम्मा भएर जागिरे जीवनको बारेमा प्रमोशनको प्रभाव बारेमा प्रवचन र भाषण दिन थाले ।

“बढुवा नभई जागीरे जीवन बित्यो । कर्मचारीको सुन्दर र सवल पक्ष भनेकै बढुवा रहेछ । अब बाजा बजाएर हिँड्नुस ।” कर्मचारी फुर्फरिन्छ “आर्यघाट स्नानगरी पशुपति गुह्येश्वरी दर्शन नगरी जागिरबाट मुक्ति मिल्दैन । बिलम्ब नगरौँ । सबै एकजुट भएर मिलेर जाऔँ ! पवित्र बागमती स्नान गरौ !”

बिग कर्पोरेट हाउसको कुरा सबैले विश्वास गरे । केही दिन अघि नौमती बाजा घन्काएर पञ्चकन्या लावालस्कर लाएर फूलमाला आफ्‌नो आफ्‌नो विभागबाट ग्रहण गरी जिल्ला जिल्लामा ‘पानीबढुवा हाकिम’को लागि रवाना भए । जागिरको अन्ततिरबाट पशुपति र गुह्येश्वरी दर्शन गर्न जाने कर्मचारीको गोल्डेन एजको संख्या घट्दै गएको भेउ युनियन हेर्ने ‘पानीबढुवा’ हाकिमले धेरै दिनसम्म त चालै पाएनन् ।

०००
तुप्चे– ४, नुवाकोट चनौटे
हाल– काठमाडौ– १५, चमती