नेपाली हास्यव्यङ्ग्य अनलाइन पत्रिका

रामशरण न्यौपाने “पाँचघरे”:

पौरखले घर नित्य सजाई
मानव जीवन उच्च बनाई
कर्मठ छन् सब धन्य रहन्छन्
ज्येष्ठहरू अति कष्ट सहन्छन्॥१

कीर्ति छ जोसित धेर फिँजेको
स्वेद छ निर्मल भूमि भिजेको
देन छ बेहद को कति गन्छन्?
ज्येष्ठहरू अति कष्ट सहन्छन्॥२

जोस छ जोसित सुन्दर भाँती
उड्न तयार छ यान समाती
शिल्प छ उत्तम लोक कहन्छन्
ज्येष्ठहरू अति कष्ट सहन्छन्॥३

भाइ र पुत्र छ सागर पारि
आँत छ चर्चर दर्द छ भारी
देश बनाउन जो गुरु बन्छन्
ज्येष्ठहरू अति कष्ट सहन्छन्॥४

दुर्गुण कल्मष फाल्दछु भन्छन्
जीवन दीप म बाल्दछु भन्छन्
निर्मल निर्झर तुल्य बहन्छन्
ज्येष्ठहरू अति कष्ट सहन्छन्॥५

ज्ञान छ जोसित भाग लगाई
पोस्न युवाकन धेर सघाई
चिन्तनमा हर रोज रहन्छन्
ज्येष्ठहरू अति कष्ट सहन्छन्॥६

०००
भक्तपुर