नेपाली हास्यव्यङ्ग्य अनलाइन पत्रिका

भलादमी भोला

तिमीलाई थाहा छ
त्यो सिंहदरबारले
आफूलाई सिंह सम्झन्छ र
दरबारभित्रका अँध्यारा कोठीमा
गर्जेर बस्छ
सिंहदरबार निरक्षर छ
तर साक्षर छु भन्दै
हाम्रा छोराछोरीका लागि
कन्सल्टेन्सी खोल्छ र
विदेश पठाउन हामीलाई
बाध्य बनाउँछ
उत्पादन गर भन्छ बजार दिँदैन
अन्याय परे बोल भन्छ कान सुन्दैन
सचेत छु भन्छ अचेतका कुरा गर्छ
हाम्रो ढाडमा भाटा हान्छ
ऊ सुरक्षा घेरामा बस्छ।
तिमीलाई थाहा छ
सिंहदरबारको दृष्टि छैन
दूरदृष्टिका कुरा गर्छ
सिंहदरबारको गति छैन
गन्तव्यको खाका कोर्छ
सिंहदरबारले जनतालाई ढाँटेर
गाउँ गाउँमा सिंहदरबार भन्यो
गाउँमा घरबार भेटिँदैन
कहाँ भेटिन्छ सिंहदरबार ।
तिमीलाई थाहा छ
ऊ त नपढीकन पनि
कानुन बनाउँ
सरकार बनाउँछ
विकासलाई बजेट छुट्याउँछ
कहिले खन्छ कहिले पुर्
उसले सिक्दा सिक्दै
एक वर्षको बजेट कता हराउँछ
त्यसैले त वर्षै पिच्छे बजेट खोज्न
सिंहदरबार बजेट बनाउँछ ।

०००
सम्पर्क :-९८४३०५४१६१
ओखलढुंगा, लिखु गाउँपालिका १