नेपाली हास्यव्यङ्ग्य अनलाइन पत्रिका

रामशरण न्यौपाने “पाँचघरे” :

अम्मली बन्योभने अवश्य गिर्छ मानव
देह बन्छ जीर्ण झन् गुमेर मान वैभव
गर्नुपर्छ यो विचार वृद्धले जवानले
शक्ति घट्छ व्यक्तिको धुवाँ र मद्यपानले॥१

बैँसमा बुढो बनी थलिन्छ देह नाहक
भन्छ लोक अम्मली र काट्छ बात व्यापक
हुन्छ धौ समाजमा न टिक्न सक्छ सानले
शक्ति घट्छ व्यक्तिको धुवाँ र मद्यपानले॥२

खान पल्किए नसा अवश्य फिर्छ हो दशा
फल्दछन् शरीरमा नयाँ नयाँ ठुला व्यथा
देह गाल्छ बैँसमै सुकी नसा थकानले
शक्ति घट्छ व्यक्तिको धुवाँ र मद्यपानले॥३

उड्छ ज्ञानरश्मि नै भुलेर शास्त्र सार नि
गिर्छ कर्मबाट त्यो मनुष्य अम्मली बनी
हेय गर्दछन् सबै स्वबन्धुले जहानले
शक्ति घट्छ व्यक्तिको धुवाँ र मद्यपानले॥४

चैन हुन्न देहमा नपाउँदा घरी नसा
रेट्न आउँछन् जुटी अनेक ताडना दशा
पार्दछन् हियो छिया र छोड्दछन् तरानले
शक्ति घट्छ व्यक्तिको धुवाँ र मद्यपानले॥५

बार हाल्छ कर्ममा र देह गाल्छ बेसरी
स्फूर्ति घट्छ अङ्गको र तेज घट्छ सुस्तरी
पार्छ जीर्ण रोगले पुकार्छ त्यो मसानले
शक्ति घट्छ व्यक्तिको धुवाँ र मद्यपानले॥६

०००
भक्तपुर