नेपाली हास्यव्यङ्ग्य अनलाइन पत्रिका

कल्पना पाैडेल जिज्ञासु :

१.
सुखी जीवन बन्छ जहाँ मेल हुन्छ विचारमा।
त्यस्तो व्यक्ति भेटिन्छ कि रैछ भने संसारमा ।
कठिन यात्रा जिन्दगीको सरल लाग्थ्यो पक्कै,
जीवन संगिनी उनैको बन्न पाए अधिकारमा ।

२.
पिरतीको सौगात वर्षे झुपडी पनि दरबार हुन्छ,
जसले दिन्छ खुसी त्यै जिन्दगीको हकदार हुन्छ ।
लोभीलाई धनै प्यारो हितकारीलाई मात्र मनको,
प्रियसीलाई त प्रियतमको हृदय नै सरकार हुन्छ ।

३.
दुधे बच्चा छोडी बिदेसिने कुनै आमाको रहर हुँदैन,
चर्किन्छ छाती सन्तान सम्झी नरोएको नजर हुँदैन ।
पुरुषबाटै शोषित पीडित कैयौँ नारी छन् प्रवासमा,
उनको त्याग अनि साहसको किन यहाँ कदर हुँदैन ।

४.
शासन उस्तै छ यहाँ पुरानो व्यवस्था फाले पनि,
नौलो समाज व्यवस्था जन्मेन खै बन्दुक उचाले पनि ।
मजदुर वर्गलाई दास बनाएकै छ अझै त्यै पुँजीवादले,
यिनै गुनासो पोख्दै आसुँ झार्छिन् नेपाल आमाले पनि ।

०००
खजुरा, बाँके