नेपाली हास्यव्यङ्ग्य अनलाइन पत्रिका

रामशरण न्यौपाने “पाँचघरे”:

यिनै जुहार दृष्टिका यिनै मुहान सृष्टिका
सुरम्य निर्झरी सरी दया र प्यार वृष्टिका
रमा उमा र शारदा बुझी म गर्छु चर्चना
समस्त मातृशक्तिमा हजार लाख वन्दना॥१

सुधार गेहको सबै सधैँ म गर्छु भन्दछन्
उठेर राष्ट्रको स्वयम् प्रधानसम्म बन्दछन्
विचार ज्ञान कर्ममा छ उच्च तीक्ष्ण भावना
समस्त मातृशक्तिमा हजार लाख वन्दना॥२

छ उच्च कामनासँगै उमङ्ग जोस जाँगर
सुकर्ममा बढी सधैँ प्रदीप्त पार्दछन् घर
तिखारिँदै छ जिन्दगी खपी हजार यातना
समस्त मातृशक्तिमा हजार लाख वन्दना॥३

सहेर कष्ट भामरी गरेर गर्भधारण
खुदा बनेर गर्दछन् अबोध बाल तारण
बुझेर तत्त्व यो सबै म गर्छु है उपासना
समस्त मातृशक्तिमा हजार लाख वन्दना॥४

यिनै बनी मियो दियो समाजको कमालको
सुसारमा निमग्न छन् बुढाबुढी र बालको
हियारमा गृहस्थको सुधारको छ कामना
समस्त मातृशक्तिमा हजार लाख वन्दना॥

०००
भक्तपुर