नेपाली हास्यव्यङ्ग्य अनलाइन पत्रिका

घनश्याम रेग्मी :

नियम सृष्टिको लाग्छ विचित्र
देह छ नश्वर अस्थिर चित्र
जसले ल्याए जीव धरामा
परमेश्वर हुन्, बाबु र आमा ।

काम गरेका साँझ प्रभात
फुर्सद के को हरदिन रात
पिठमा शिशुकासाथ गरामा
परमेश्वर हुन् , बाबु र आमा ।

शिशुको जीवन सार्थक पार्न
श्रमले खट्दछ भुवन छ खार्न
तर पनि शिशुको ध्यान हियामा
परमेश्वर हुन् , बाबु र आमा ।

उन्नति कसरी शिशुको हुन्छ
अवसर कसरी नव भित्रिन्छ
नव नव शिक्षा दिनमा धामा
परमेश्वर हुन् , बाबु र आमा ।

जन्म दिलायौ धरती चुम्न
फूल पातका सँगमा घुम्न
हृदय केन्द्रमा शिशुको छाया
परमेश्वर हुन् , बाबु र आमा ।

लोक चिनाए धर्म चिनाए
समय परिस्थिति मर्म चिनाए
जीवन उनकै उनकै काया
परमेश्वर हुन्, बाबु र आमा ।

००
विकास चोक , भरतपुर ५, चितवन