नेपाली हास्यव्यङ्ग्य अनलाइन पत्रिका

दीनानाथ पोख्रेल :

घरका ईश्वर चिन्नुछ मैले ।
सौख्य सुबाटो खुल्छ क्रमैले ।।
पालनहारी गर्थे धामा।
परमेश्वर हुन् बाबु र आमा ।।०१।।

चञ्चलता सब दूर हटाऊँ।
उनका पदमा भक्ति चढाऊँ ।।
बाबु र आमा कृष्ण र श्यामा।
परमेश्वर हुन् बाबु र आमा ।।०२।।

उनले हेरे बाल्यावस्था ।
वचन नलाऊँ भालाजस्ता ।।
वृद्ध रमाऊन् छानूँ काम।
परमेश्वर हुन् बाबु र आमा ।। ०३।।

सत्य र साँचो बोल्ने गर्दा।
मनको ढोका खोल्ने गर्दा ।।
हाँस्ने गर्छन् वृद्ध थलामा ।
परमेश्वर हुन् बाबु र आमा ।।०४।।

सुखमय पार्दा मानव चोला ।
बग्छन् दिलमा हितका खोला ॥
छाओस् ध्वनि मृदु नित्य गलामा ।
परमेश्वर हुन् बाबु र आमा ।।०५।।

मनमा माया हरदिन राखे ।
उनले मेरो प्रिय पथ डाके ॥
नित्य पुकारूँ श्रमले नाम ।
परमेश्वर हुन् बाबु र आमा ।।०६।

०००
सुम्बेक, इलाम-२ इलाम