नेपाली हास्यव्यङ्ग्य अनलाइन पत्रिका

दीनानाथ पोख्रेल :

पालक पोषक हुन् सब हाम्रा ।
कृत्य प्रदर्शक हुन् सब राम्रा ।।
सागर तुल्य बनेर बहन्छन् ।
ज्येष्ठहरू अति कष्ट सहन्छन् ॥०१॥

उठ्नुछ जुट्नुछ देश सिँगार्न ।
जाग्नुछ लाग्नुछ भोक पछार्न ।।
सङ्कट धेर छ वृद्ध कहन्छन् ।
ज्येष्ठहरू अति कष्ट सहन्छन् ।।०२।।

जोत्नुछ खेत र रोप्नुछ धान ।
कर्म गरेपछि बढ्‌दछ मान ॥
सुन्दर छन् कृत बाँचिरहन्छन्।
ज्येष्ठहरू अति कष्ट सहन्छन् ।।०३।।

शून्य भयो घर कर्म विहीन ।
बन्दछु रोग हटाउन लीन ।।
छन् तनया पर पुत्र परै छन् ।
ज्येष्ठहरू अति कष्ट सहन्छन् ।।०४।।

अब्बल भूमि छ बञ्जर जम्मै ।
शासक चेत छ शून्य अचम्मै ।।
रुग्ण छ त्यो तन सन्तति खोज्छन् ।
ज्येष्ठहरू अति कष्ट सहन्छन् ॥०५॥

०००
सुम्बेक, इलाम-२ इलाम