नेपाली हास्यव्यङ्ग्य अनलाइन पत्रिका

हरिप्रसाद घिमिरे :

हाँस्यो हिमाली जब शैल हाँस्यो
सल्ला धुपीको रुख पात हाँस्यो
पहाड हाँस्यो अनि त्यो तराई
हाँस्यो गरिबी मनुवा हराई।।

त्यो भेष हाँस्यो परिवेश हाँस्यो
नाङ्गै हुँदा ती तल माथि हाँस्यो
सीमा सधैँ हाँस्दछ अट्टहाँस
जताततै चल्छ यहाँ सुवाश।।

छाप्रा र झुप्रा पनि मस्त हाँसे
ठेलाहरूले पनि बास मागे
खुसी हुँदै संसद गेह हाँस्यो
नेपालको सुन्दर देह हाँस्यो ।।

गुठी यहाँ हाँस्तछ बारबार
नेता यहाँ छन् अति नै अपार
नेपाल बस्ने परिवार हाँस्यो
हिमालले दैनिक चट्ट हाँस्यो।।

शिक्षा र त्यो स्वास्थ्य अत्यन्त हाँस्यो
छ रोजगारी पनि नित्य हाँस्यो
विज्ञानको खोज छ रोज हाँस्यो
मान्छे हराए पनि मोज हाँस्यो।।

हाँस्यो विदेशी ऋण धेर हाँस्यो
भत्केर त्यो मन्दिर धेर हाँस्यो
हाँसे सबैका घरबार हाँसे
जलेर हाम्रा दरबार हाँसे ।।

०००
नागार्जुन- ३, काठमाडौं