नेपाली हास्यव्यङ्ग्य अनलाइन पत्रिका

रमेश समर्थन :

१.
को को आफ्ना र को को अर्का फिटिक्कै बुझ्दैनन्
को को नरम र को को चर्का फिटिक्कै बुझ्दैनन्
नेताले जनताको हितमा गाडी किने, दरबार बनाए
जनताले आफ्नै नेताका पिरमर्का फिटिक्कै बुझ्दैनन् ।

२.
अभावको कालो रात एकपल्ट त देख्नैपर्छ हामीले
धैर्य र स्वावलम्बनको इतिहास लेख्नैपर्छ हामीले
घुँडा टेक्नु हार्नु मात्र होइन, उठ्ने प्रयास पनि हो
दह्रोसित उभिन एकपल्ट त घुँडा टेक्नैपर्छ हामीले ।

३.
यी प्रायोजित समाचारसित के मतलब ?
यी झुट ओकल्ने अखबारसित के मतलब ?
मतलब छ त मलाई केवल मेरो नेपालसित
कठपुतलीझै चल्ने सरकारसित के मतलब ?

४.
उनी जे जे कुरा गर्छन् सबै ख्यालख्याल लाग्छन्
उनले उछिट्याउने थुक रेबिजयुक्त ऱ्याल लाग्छन्
उनी त हामीलाई अभिभावक र रक्षक लाग्नुपर्ने हो
तर किन सबै नेताहरू धूर्त ब्वाँसा र स्याल लाग्छन् ?

०००
रूपन्देही
बदनाम आँचल (२०८२)