नेपाली हास्यव्यङ्ग्य अनलाइन पत्रिका

कोषराज न्यौपाने :

शरद् अँध्यारो देख्तै छु दसैँमा यसपालि म
इजरायलबाटै झन् शरद् अध्यारियो कि न
देशको स्थिति सुध्रन्न विदेश अलमल्ल छ
जनताको दशा उस्तै सर्वत्र असरल्ल छ ।१।

दसैँ बिचल्ली कस्तो छ हेर्नुहोस् गङ्गबू गई
दुर्दशा जनताको छ को कहाँ को कहाँ भई
यात्रीको दुर्दशा जस्तो बस्नेको पनि दुर्दशा
यो हाम्रो देशमा साँच्चै थुप्रिएको महादशा ।२।

यौटा वर्ग सुतेको छ मस्तीमा छैन आकुल
बाँकी सबैजनालाई देखिँदो छ व्याकुल
देशका निम्ति सोच्ने को के हो नियम कानुन
छट्पटीमा छ यो देश छैनन् कानुन वा नुन ।३।

मभित्र छट्पटी पोल्छ यस्तै हो कि सबैतिर
जिन्दगी पिल्सिएका छन् सर्वत्र चौकुनातिर
यो बेला म दसैँ मानौँ या तिहार खुसी बनी
हाँसेको छैन यो देश के भनौँ बेखुसी बनी ।४।

छठमा सूर्य मुस्कन्नन् रुन्छ नेपाल संवत
कुना छेउ तथा बीच सर्वत्र देशमा खत
ढाड सेक्तो छ महँगी दूर छन् मृदु भावना
यो बेला कसरी अर्पौँ हर्षले शुभकामना ।५।

०००

काठमाडाैं