मिश्र वैजयन्तीबाघले आगो खाएपछि
अरुकै आक्रोशको आँसु र पसिनाले आगोको राप निभ्छ आगो निभेको बाघ चिसो हुन्छ, बाघ हुनुको अर्थ तातो हुनु हो, चिसोले बाघ हुँदैन बाघको आगो निभेपछि खानुको अर्थ बद्लिन्छ र बाघले माटो खान्छ ।
मिश्र वैजयन्ती :
खानु भनेको बाँच्नु हो,
बाँच्न, मोटाउन, पुस्टाउन, सप्रिन,
खानुपर्छ-छु भन्न ।
कन्तबिजोग हुनलाई पनि
अपच हुनेगरी खाएर खाइँदोरहेछ ।
हुन त मर्नलाई
विष पनि खाएका छन् कतिले,
ख्वाएका र कोच्याएका छन् कतिले ।
इज्जत राख्न खाएर इज्जत फालेका छन् कतिले ।
मात्नेगरी, लड्नेगरी खाएर लडेपछि- उडेपछि
सरम लाग्दा लाग्दा
सरम पनि पचाएको छ कतिले ।
कतिले पानी खाएर
कतिले ढिँडो र गुन्द्रुक खाएर
कतिले जङ्गली कन्दमूल खाएर
भोक मारेका छन्
बाँचेर देखाएका छन्
छु भन्ने पारेका छन्
कतिले गाली खाएर
कतिले बारुद खाएर
बाँचे बचाएका छन् आफूलाई
भोक सबैलाई लाग्दोरहेछ ।
आग्लो लाएका ओठहरू
मुर्दा जीवन र चिसा विचारहरू
गाँठो कसिएका आस्थाहरू
अघाएका विरुद्ध उठ्ने
निस्कलङ्क भोकहरू
जुर्मुराएपछि युद्धको जङ्गलमा गतिहरू
बाघहरू गर्जिएका स्वरका विरुद्ध
चटपटाएपछि
बाघलाई पनि खानको जोश आउँदोरहेछ
भोकमाथि भोक अझ लाउँदोरहेछ ।
बाघले मुग र हरिण खान्छ,
गाई र बाखा खान्छ,
बाघले मान्छे खान्छ, बाघले बाघलाई नै खान्छ,
खाँदाखाँदै अझ खाँदा बाघले आगो खान्छ
बाघले आगो खाएपछि
आगोलाई हुरीले उडाएपछि
अरुकै आक्रोशको आँसु र पसिनाले
आगोको राप निभ्छ
आगो निभेको बाघ चिसो हुन्छ,
बाघ हुनुको अर्थ तातो हुनु हो,
चिसोले बाघ हुँदैन
बाघको आगो निभेपछि
खानुको अर्थ बद्लिन्छ र बाघले माटो खान्छ ।
०००
नवरत्न (२०६४)
Subscribe
Login
0 Comments
Oldest
