नेपाली हास्यव्यङ्ग्य अनलाइन पत्रिका

अनिल पौडेल :

ए. एल.र बी फोरले थप्पड हानेर
गालाको रङ खुइलिएको हो
बायोमेट्रिक सिस्टमले चेक-आउट गरेर
इन्टरनेट बैङ्किङले रिजेक्ट गरेको हो
एउटा पूर्वको भूत
अर्थात् भूतपूर्व लाहुरे
पल्टनको कोड नं. ३३८९
जिन्दगीको वासलातमा केही अङ्क छुटेर
नयाँ म्यानुअल हेर्न आएको छ
समृद्धिको सगरमाथा चढ्ने रहर बोकेर
आफ्नै उमेरको स्प्रेडदर फेर्न आएको छ
हरेक पल्ट प्रश्नका पुलिन्दाले सोधिरहेछन्
रिभर्स भौचर उठाएर एकपल्ट
नागरिकताको उमेर तल झारौँ कि ?
के. वाई. सी. फाराममा टिपेक्स लगाएर
स्थायी ठेगाना अन्तै सारौँ कि ?

भूपूले बगाएको पसिनाको पहाड
खजान्चीले कुन लकरमा थुनेको छ ?
६/१/१ मा भुक्तानी दिन राखेको बैँस
गाउँको शाखाले ख/ज पत्रमा उनेको छ
कसले भन्यो सदुपयोगिता निरीक्षणमा जानेहरू
जागिरको खाँडो पखालेर गए भनेर ?
उनीहरू फेसबुकको भित्तामा नातिसँग
रहरका लहरहरू सजाइरहेछन् ।
सी. एस. आर. प्रोग्रामको भेटघाटे चौतारीमा
सी.डी. रेसियोको किबोर्ड बजाइरहेछन् ।

०००
सुन्दरहरैँचा नगरपालिका – ५, मोरङ ।
हाल : काठमाडौँ ।