राेहिणी रसिकछन् बेच्न बाँकी अझै
जुध्ने जात र रङ्गका विषयले साँडेहरू छन् जुरे हेर्दा साधु समान दुष्टमनका ढाडेहरू छन् भुँडे अर्काको वहकाउमा वहकिने सोझा हुने देशमा जे खोजे पनि मिल्छ खोज कवि हो छन् बेच्न बाँकी अझै ।
रोहिणी रसिक :
हाम्रासामु हजारथान अमिला भोगाइका चाङ छन्
हाँसो बन्चित ओठ छन् सडकमा हेपाइका डाम छन्
भित्री आसय छोप्न माहिर यहाँ बुट्टामयी खाम छन्
जाने देख्न चुसेर व्यग्र पसिना मोटाउने नाम छन् ।
हेर्दा सुन्दर ताल नाद छहरा खोक्र्याउने छन् यहाँ
बिर्सी धर्म कमाउने नियतका आत्मा हुने छन् यहाँ
अर्काको अपनत्वका विषयले जल्नेहरू छन् यहाँ
जाने हेर्न विरक्त आँसु पिउदै ढन्नेहरू छन् यहाँ ।
फुल्ने फूल गुराँसका वनहरू मास्नेहरू छन् त नि
पार्दा आपद छेउछाउ तिरका हाँस्नेहरू छन् अनि
खुट्टा तान्न सिपालु मोल्न पिडुला सर्वत्र जान्नेहरू
हाम्रै गाउँ समाज पार्न फितलो हाम्रै बिगार्नेहरू ।
छन् बा बृद्ध मुमा अशक्त अनिदा छ्न् झुस्स पाखाहरू
रित्ता छन् घर गाउँ मानिस बिना सन्त्रस्त आँखाहरू
लाखौँलाख विचौलिया जहरिला ब्वाँसाहरू छन् यहाँ
देखेनौ कविले ? असङ्ख्य उपियाँ उफ्री रहेछन् जहाँ ।
छन् विद्यालय टन्न शुल्क असुली व्यापार गर्ने निकै
छन् मन्त्रालय भ्रष्टका नजरमा चल्दै गरेका ठिकै
रोगी छन् उपचार धान्न नसकी ओछ्यान पर्ने यहाँ
अर्काको अपकारमा नित खुसी बैमान गर्ने यहाँ ।
खोला मुर्तिहरू पहाड सुनका बेच्नेहरूका घर
राम्रा छन् अतिभव्य छन् शिखरझैं देदीप्य छन् सुन्दर
हाम्रा संस्कृति सभ्यता निधिहरू बेच्नेहरू दाममा
हाँक्दैछन् अझसम्म देश दुनियाँ छन् बेच्न बाँकी अझै ।
तानातान लुछाचुडी र झगडा हिंसा वलात्कार छ
डाकाका सरदारको सदनमा शार्दूल हुङ्कार छ
लुट्ने इज्जतका अनेक गण छन् कालाबजारी अति
छन् शान्तित्व सिकाउने गुरुहरू सम्पत्ति जोड्दै कति ।
जुध्ने जात र रङ्गका विषयले साँडेहरू छन् जुरे
हेर्दा साधु समान दुष्टमनका ढाडेहरू छन् भुँडे
अर्काको वहकाउमा वहकिने सोझा हुने देशमा
जे खोजे पनि मिल्छ खोज कवि हो छन् बेच्न बाँकी अझै ।
०००
खार्पा, खोटाङ
Subscribe
Login
0 Comments
Oldest
