नेपाली हास्यव्यङ्ग्य अनलाइन पत्रिका

अर्जुन पराजुली :

तिनीहरूको देशमा दिनकादिन
पुरानु कार भत्किन्छ, नयाँ कार बन्छ !
मेरो देशमा दिनकादिन
पुरानु सरकार भत्किन्छ, नयाँ सरकार बन्छ !

तिनीहरूको देशमा नयाँ कार बनाउन
नयाँनयाँ यन्त्रको आविष्कार हुन्छ !
मेरो देशमा नयाँ सरकार बनाउन
नयाँनयाँ षडयन्त्रको आविष्कार हुन्छ !

तिनीहरूको देशमा यन्त्रले
फलाम काटछ, पगाल्छ, तोडछ, जोड्छ, र
कार पहिलेको भन्दा सुन्दर बनाउँछ !
मेरो देशमा षडयन्त्रले
पार्टी तोड्छ, फोड्छ, जोड्छ, र
सरकार, पहिलेको भन्दा कुरुप बनाउँछ !

तर, फरक के छ भने-
तिनीहरूको देशमा आफ्नु कार बनाउन
पार्टपूर्जा पनि आफ्नै चाहिन्छ,
मेरो देशमा आफ्नु सरकार बनाउन
सांसदहरू आफ्नु चाहिँदैन,
सुपरमार्केटमा किन्न पाइन्छ ।

०००
कीर्तिपुर