नेपाली हास्यव्यङ्ग्य अनलाइन पत्रिका

हुलिया

दर्शन दिने वाचा गर्नेको बसेको छु पालो
आज्ञाकारी समूहभित्र बजाइँदैछ जोडले रालो,
टेन्डर, गोष्ठी, ठेक्का, भ्रमण सबै मन्त्रीजीको सालो
सिद्धान्तनिष्ठ भनाउँदाको डङ्गुर रै’छ भित्रै कालो ।

परिचय

दौरासुरुवाल, कोट, टोपी भित्र ला’को भोटो
तिम्रो हाम्रो गोठालाको व्यवहार सारै खोटो
अभाव र तृष्णा जति सबै हाम्रा भागमा
मीठो खान्छ, राम्रो लाउँछ शरीर उसको मोटो ।

हाम्रा प्रतिनिधि

कहिले कुटाकुट गर्छन् संसदमै
कहिले फुटाफुट गर्छन् पार्टीमा
भत्ता, नाफा र सुविधाका लागि
मस्किँदै मुखामुख गर्छन् ।

पोसाक

गुन्युचोली हराएछन् हिजोआज
माइक्रो मिडीकै जीत भो
साडीचोलाहरू फ्लप हुँदै जाँदा
पारदर्शी पोसाक नै हिट भो ।

समय

समान अर्थ बोक्छन् जिन्दगी र काँचका चुराहरू,
काम गर्न नसक्नेले कोरल्छन् केके कुराहरू,
समय हिजो जस्तो छैन आज बदलिएको छ,
ध्वाँस दिन्छन् बूढा बालाई जुँगा नउम्रेका भुराहरू ।

कर्तव्य

अब देश खोक्रिँदैंछ समस्याका छन् रासहरू
बन्द, आन्दोलन र तोडफोडले निम्त्याएको छ भासहरू
विकास नफल्ने भैगो, उन्नति चौपट बनेपछि–
बन्जर भूमिमा कसले चलाउने हलो ?
कसले लगाउने चासहरू ?

अन्तर

युद्धको हंकीडंकी छ अचेल,
बुद्ध कुक्रुक्क कक्रिएको कुनामा,
इमानदारहरू पाखा लागेका छन्
बेइमान निर्धक्क डुक्रिएको– मैदानमा ।

मन्थली, रामेछाप